Rusiye Federatsiyasınıñ Federal telükesizlik hızmeti «tutulğan Ukrayına casusınıñ» videosını paylaştı. Videonı Rusiyeniñ RİA Novosti neşiri derc etti.
Agentlik bildirgenine köre, 25 yaşında genç qız «Rusiye arbiy obyektleri ve «Vostok» gruppirovkasınıñ tehnikası aqqında malümat berdi». Haberde aytılğanına köre, Ukrayına vatandaşı apiske alındı, casuslıq maddesine istinaden dava açıldı.
«Mediazona» neşiri bildirgenine köre, videoda Leniye Umerova olğanına oşay – Rusiye mahsus hızmetleri qırımlını 2022 senesi dekabr ayında tuttı.
Bıltır dekabr ayında 25 yaşında Leniye Umerova Kyivden Qırımğa ketmege mecbur edi, çünki babasınıñ qanseri bar. Rusiye sıñırcıları Leniye Umerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı.
Ağası Aziz Umerov Qırım.Aqiqatqa izaat berip, qardaşı üç ay devamında çetele vatandaşları içün merkezde tutuldı, der tarif etti. Amma martnıñ 13-nde mahkeme qararınen onı andan azat etip aldılar.
«Advokatlarğa, tuvğanlarına telefon etmege imkân bermediler – gece yarısı onı o merkezden çıqardılar. Bundan soñ vatandaş urbada erkeklernen maşina keldi, başına çuval taqqanlar, belli olmağan yerge alıp ketkenler ve soqaqqa atqanlar», – dep tarif etti Umerov.
Aman-aman birden Leniyeni vesiqaları olmağanı içün polis patruli tuttı, dep tarif etti ağası. Rusiye mahkemesi ise onı 15 künge apiske aldı. Soñra qızğa qarşı daa eki protokol tizildi – ana-babasına telefon etmek içün qullanğan telefonını vaqtında bermegeni ve konvoy maşinasından çıqmağa razı olmağanı içün. Eki sefer de mahkeme Ukrayina vatandaşınıñ apis müddetini 15 künge uzattırdı.
Qırım Muhtar Cumhuriyeti ve Aqyar prokuraturası Rusiye tarafından qırımtatarı Leniye Umerovanıñ tutulğanını tahqiq etip olamay, çünki bu cinayet Qırımda olmağan.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
