Advokat Sergey Loktevniñ bildirgenine köre, FSB hadimleri Emir-Usein Kukuğa qarşı «Hizb ut-Tahrir» teşkilâtında iştirak etkenine dair delillerniñ bir qısmını sahteledi. Bu aqta avgustnıñ 29-nda Kukunıñ bilgisayarı baqılğan Şimaliy-Kavkaz okrugı arbiy mahkemesiniñ oturışuvında belli oldı.
Qabaatlanğannıñ bilgisayarı baqılğanda 2014 senesi aprel ayında bilgisayar alınğanda olmağan cüzdan tapıldı.
«Kukunıñ evinde saba saat 8-den 11-ge qadar tintüv keçirilgen edi. Saba saat 11-den soñ bilgisayar şaatlar ögünde alındı ve sarıldı. O künü quvetçiler saat 12-de bu bilgisayarnı Aqyardaki FSB operativ bölüginiñ binasında baqmağa başladı. O vaqıt bilgisayarnıñ masasında bu cüzdan daa yoq. Daa soñra bilgisayar Aqmescitteki FSB tahqiqat bölügine berile. Anda 2016 senesi mayısnıñ 17-nden 18-ne qadar onı kene baqalar ve acayip bir şekilde masada «printskrin» adlı cüzdan qayd etile. Bu cüzdannıñ içinde daa sekiz cüzdan bar», – dep tarif etti Loktev.
Emir-Usein Kukunıñ bilgisayarındaki cüzdanlarda tapılğan fayllarnıñ malümatına köre, olar 2014 senesi aprelniñ 20-nde saat 13:00 14:00 arasında açılğan edi, yani bilgisayar tintüv çerçivesinde tutıp alınğan soñ.
«İmaye bilgisayar tintüv vaqtında alınğan soñ anda deñişmeler oldı, dep bildirdi mahkemede. Bilgisayarda bu fayllar yoq edi, dep aytamız. Olar olmasa, böyle yañlış delillerge esaslanmağa da mümkün degil. Daa ziyadesi, bunı biz aytmayıq. Bu fayllarnıñ malümatı er şeyni añlata. Olar bilgisayar Kukudan alınğan soñ açılğan edi», – dep añlattı advokat.
Mahkeme, imayeniñ Kukunıñ evinde tintüv keçirgen ve eşyalarnı alğan FSB operativ hadimi Aleksandr Kompaniytsevni ve şaatlarnı sorğuğa çekmek muracaatını red etti. Bundan ğayrı, mahkeme işbu bilgisayarnıñ tehnik ekspertizasını yapmağa razı olmadı.
Haber derc etilgende FSB tahqiqatçıları bunıñnen bağlı izaat bermedi.
Aprelniñ 4-nde haber etildi ki, Rostov-na-Donu Şimaliy-Kavkaz okrugınıñ arbiy mahkemesi Yaltadaki «Hizb ut-Tahrir davasını» temelden baqmağa başladı.
Dava boyunca qabaatlanğan Arsen Cepparov, Refat Alimov, Emir-Usein Kuku, Muslim Aliyev, İnver Bekirov ve Vadim Siruk 2016 senesi fevral-aprel aylarında Yaltada tutulğan ediler. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatladılar.
Ukraina Tış işler nazirligi Rusiyeden Yaltadaki «Hizb ut-Tahrir davasınıñ» mabüslerini azat etmesini talap ete.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
