«Erte ya da keç adalet yeñecek» – Emir-Üsein Kukunıñ oğlu (video)

Yaltadaki «Hizb ut-Tahrir davasınıñ» mabüsi Müslim Aliyevniñ evinde qalabalıq. Aluşta civarındaki Yuqarı Şuma (Verhnâya Kutuzovka) köyüne bir qaç on insan keldi: Eski Qırım, Aqmescit, Canköy, Bağçasaray ve yarımadanıñ diger rayonlarından. Dua içün toplaşqanlar – Kreml reineleriniñ tez vaqıtta azat etilmesi içün dua ettiler. Üç yıl evelsi, 2016 senesi fevral ayında, Rusiye uquq qoruyıcıları tintüvden soñ «Yaltadaki davanıñ» birinci mabüslerini tutqan edi. Olarnıñ arasında aq qorçalayıcı Emir-Üsein Kuku da bar edi. Onıñ yaş oğlu Bekir babasınıñ sözlerini eminliknen tekrarlay: «Erte ya da keç adalet yeñecek». «Bir kün epimiz toplaşıp, olıp keçkenlerni qorqunç bir tüşni kibi hatırlaycaqmız», – dey o. Arsen Cepparov, Refat Alimov, Emir-Üsein Kuku, Müslim Aliyev, İnver Bekirov ve Vadim Siruk 2016 senesi fevral-aprel aylarında tutulğan edi. Altısı da Rusiyede yasaqlanğan «Hizb ut-Tahrir» islâm siyasiy teşkilâtında iştirak etkeninde qabaatlana.