Frenkistan iş adamı Fransua-Anri Pino (Francois Henri Pinault), Notre Dame de Paris kilsesiniñ restavratsiyasına 100 million yevro hayır-ihsan etti. Bu aqta “Nastoyaşçeye vremâ” televizion kanalı bildire.
“Bu facia er fransızğa tiydi. Er kes bizim bu umumiy mirasımıznı tezce ğayırdan tiklemek istey”, - dedi Pino. Paralarnı milliarderniñ Artemis şirketi ayıracaq.
Daa evel Frenkistan prezidenti Emmanuel Macron, aprel 15-inde yanğınğa oğrağan Notre Dame de Paris katedral kilsesi tamir etilecegine söz berdi.
Macron tünevinki adisege “deşetli facia” dedi, amma “beterinden qurtarılıp oldıq”, dep qoştı ve abide tamirine halqara aqça toplamasını ilân etecegini bildirdi.
Yanğın neticesinde 850 yıllıq gotik inşaatınıñ kulâ ve damı bozulğan, amma esas konstruktsiya, hususan, eki çañ qullesi, saqlanıldı.
Polis, yanğın sebebi alâ daa belli olmağanını bildirdi, amma Parijniñ yanğın bölügi, yanğın keçirilgen restavratsiya işlerinen bağlı olmaq mümkün, dep ayta.
Yanğın söndürüvinde qurtarıcılardan birisi ağır yaralanğan.
Dünya liderleri Frenkistan halqına yazıqsınuv ve göñüldeşligini bildirdi.
Notre Dame de Paris katedral kilsesiniñ kulâsı yanğın neticesinde eşildi.
Aprelniñ 15-inde aqşam Parij merkezinde meşür Notre Dame de Paris kilsesinde yanğın cıqtı.
Parij merkezinde olğan katolik kilsesi, Frenkistan paytahtınıñ timsallerinden birisi. Parij yeparhiyasınıñ katedral kilsesi. O Site adasınıñ şarqiy tarafında, şeerniñ dörtünci okrugında qurulğan edi. Bundan evel o yerde Parijniñ birinci hristian kilsesi - Muqaddes Stefannıñ bazilikası tura edi, o ise, Gall-Romalarnıñ Yupiter kilsesiniñ bina temelinde qurulğan edi. Gotik kilse Moris de Sülli Parij yepiskopınıñ teşebbüsi ile 1163-1345 seneleri qurula edi. Altar qısmı 1182 yılı muqaddesleştirildi.
