Ukrayına cenkniñ «pek faal fazası» arfesinde buluna, dep bildirdi Ukrayına Mudafaa nazirliginiñ Baş istihbarat idaresiniñ vekili Andriy Yusov Freedom telekanalınıñ yayınında.
«Tezden nevbetteki Ramştayn olacaq, Ukrayınağa arbiy yardım haberleri olacaq. Şunıñ içün qısmen seferber etilgen ve «Vagner» ve diger şahsiy arbiy şirketlerniñ cinayetçilerini ücüm areketlerine yollamağa devam eteler. Ukrayına arbiyleriniñ ustalığı ve motivatsiyasınen beraber tehnika ve em yerli, em halqara ortaqlardan kelgen silâ – soñunda bu ücüm areketlerini de yoq etecekler. Biz pek faal fazanıñ arfesinde bulunamız. Fevral ve mart – pek faal uruş areketleri olacaq», – dep qayd etti o.
Yusovnıñ aytqanına köre, Rusiye «sayınen» cenkleşe. «Rusiye cemiyeti buña daa sabır ete. Amma Rusiye Federatsiyasına ketken cesetlerniñ ve ağır yaralanğanlarnıñ sayısı erte ya da keç bu zombi cemiyetine de tesir etecek», – dep qoştı o.
Resmiy şahıslar, mesleatçı ve ekspertlerniñ fikri esasında yazılğan Bloomberg neşiri öz maqalesinde Rusiye yañı ücüm azırlay, dep bildirdi. Kremlge yaqın neşir menbalarınıñ aytqanına köre, yañı ücüm fevral-mart aylarında başlana bile – Kyiv ABD ve Avropa tanklarını almazdan evel.
Ukrayına milliy telükesizlik ve mudafaa şurasınıñ kâtibi aytqanına köre, Rusiye eñ yaqın vaqıtta «büyük kerginlikke» azırlana, Kreml yolbaşçısı Vladimir Putin büyük ihtimalnen şimal, cenüp ve şarqtan Ukrayınağa daa bir kere ücüm etmege tırışacaq.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
