Ukrayına ordusı ücümni devam ettirip, işğal altındaki Qırımğa kirse bile, Rusiye özek silâsını qullanmaycaq. Bu fikirni Ukrayına Mudafaa nazirliginiñ Baş istihbarat idaresiniñ reberi Kırılo Budanov The Washington Post intervyüsında ayttı.
Rusiye memurlarınıñ Ukrayınağa qarşı büyük zarar silâsını qullanuv imalarını «qorquzuv taktikası» dep adlandırdı.
«Rusiye – er şey beklengen bir memleket, amma açıq idiotlıq olmaz. Bağışlañız, amma olmaycaq. Özek silâsı tek Rusiyeniñ cenkte yeñilüvine degil, onıñ dağılmasına sebep olacaq. Ve bunı yahşı bileler», – dedi Ukrayına istihbarat yolbaşçısı.
Cebedeki vaziyetni aytıp, Budanov Rusiye ordusı Beyazrusiyeden ücüm eteceginiñ ihtimali pek alçaq olğanını qayd etti. Onıñ fikirince, Rusiye ordusı Donetsk ve Lugansk vilâyetlerinde ğayret kösterecek. Esas uruşlar anda kete, Ukrayına Silâlı quvetleri mudafaa qoruy.
Baş istihbarat idaresiniñ yolbaşçısı aytqanına köre, cebede 320 biñden çoq Rusiye askeri bar. Rusiye Mudafaa nazirligi de küzde olğan seferberlik esabatını berip, tahminen aynı raqamnı aydınlattı. 2022 senesi fevral ayında Ukrayınağa qarşı büyük ücüm başlatqan gruppirovkada qararnen eki qat az arbiy bar edi.
Rusiye Devlet dumasınıñ yolbaşçısı Vâçeslav Volodin Ğarp memleketlerini «büyük felâket» ve «yoq etüvnen» qorquzdı. Onıñ telegramda yazğanına köre, Rusiye özek silâsını qullana bile.
Rusiye prezidenti Vladimir Putin yaqında Rusiye özek doktrinası aqqında fikir yürsetip, tenbi darbesini endirüv imkânını red etmedi. «Rusiye birinci olıp özek silâsını qullanmasa, ekinci de olmaycaqtır», – dep ayttı Kreml yolbaşçısı. Tenbi darbesi cevap darbeden daa semereli olur, dep ima etmege istegendir.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
