Aqmescit civarındaki Şumhay (Zareçnoye) köyüniñ camisinde Rusiye quvetçileri «tahqiqat tedbirlerini» keçire. Bu aqta «Qırım birdemligi» cemaat birleşmesi haber ete.
«Cuma namazından soñ insanlar cami azbarında qaldı, imamnen subet keçirile», – dep aytıla haberde.
Faallerniñ malümatına köre, anda «E» Merkezi ve OMON hadimleri buluna.
Rusiye quvet müessiseleriniñ izaatları daa yoq. Qırım.Aqiqat tafsilâtlı malümat almağa tırışa.
2019 senesi aprel ayında Aqyarnıñ Balıqlava rayonında Rusiye quvetçileri imam Rustem Abilevniñ evinde tintüv keçirdi. Abilev imamlıq yapqan camide tahqiqat tedbirleri keçirilgen soñ quvetçiler evine yol aldı.
Daa soñra Rustem Abilev Aqyardaki Rusiye FSBsiniñ idaresine alıp ketirildi. Rusiye FSBsi aqyarlını «ekstremist faaliyetine çağırğanından şübheli sayıp» tutqanını bildire.
