«Qırım birdemligi» koordinatorı ve cemaat imayecisi Mustafa Seydaliyevge qarşı Rusiye Memuriy uquq bozma qanunnamesiniñ 20.1.1 maddesine binaen memuriy protokol tizdiler. Birleşmeniñ malümatına köre, Seydaliyevge rus polisi şaatlarnen kelgen.
Polis hadimi Qırımda kütleviy tedbirler yasaq olğanını, prokuratura ise qırımtatarnıñ bir kişilik piketine cevap bermesine talap etkenini bildirgen.
Seydaliyev Rusiye Anayasasınıñ 51-nci maddesine atfı etip, şaatlıq etmekten red etken. Soñra polis hadimi protokol tizgen, birleşmeniñ koorndinatoır ise, aqları ve mecburiyetleri añlatılmağanını ve talap etkenine baqmadan bir terciman ketirilmegenini bildirgen. Qanun qoruyıcı organlarnıñ hadimi protokolnı mahkeme yollaycağını ve Seydaliyevge mahkeme celpnamesi kelecegini aytqan.
Poliste bu vaziyetni tefsir etmediler.
Qırımnıñ Qarasuvbazar rayonında rusiye quvetçileri "Qırım birdemligi" teşebbüsiniñ koordinatorı Mustafa Seydaliyevniñ qayd etilgen yerine keldi.
Rusiye quvetçileri qırımtatar faalleri Aziz Karahalilov ve Arsen Yakubov, “Qırım birdemligi” cemaat birleşmesiniñ koordinatorı Mustafa Seydaliyev ve mühbiri Emin Rustemovnı ziyaret etip, olarğa “Qırım Cumhuriyetinde yüksek azırlıq vaziyeti” rejiminiñ tayin etilmesi sebebinden mitingler keçirilmesiniñ ve ziyaret etilmesiniñ yasaq etilmesi aqqında tenbi vesiqasını berdiler.
