Qırımtatar faali İsmail Ramazanov iyülniñ 9-nda Qırımda Rusiye quvetçileri ve yerli akimiyet tarafından qırımtatarlarğa qarşı yapıla bilecek provokatsiyalar aqqında bildire.
«Vaqtınca işğal etilgen Qırımdaki semetdeşlerimizden, hususan Aqmescitten kelgen malümat qasevetlendire. Qırımdaki işğalci akimiyet kütleviy provokatsiyalar yapacaq ve, belki, insanlarnı apiske alacaq kibi malümat bar, bir ihtimal bar, amma malümat tasdıqlanmadı», – dep ayttı o, Facebooktaki video muracaatında.
Ramazanov, iyülniñ 7-nde tintüvlerden soñ tutulğan qırımlı musulmanlarnıñ sıñırlav tedbiri belgilenecek Aqmescit mahkemesi ögünde provokatsiyalar ola bile, dep ayta. O, semetdeşlerini muqayt olıp, birer-birer yürmemege çağırdı.
«Ateş olmağan yerden duman çıqmaz, diqqatlı oluñız», – dedi faal.
Onıñ qayd etkenine köre, iyülniñ 9-nda Kyivde faaller Rusiye elçihanesiniñ binası ögünde yarımadada tutulğan ve apiske alınğan qırımtatarlarğa qol tutuv aktsiyalarını keçire bile.
Ramazanovnıñ provokatsiyalar malümatını isbatlaycaq diger menbalar yoq.
Qırımtatar milliy areketiniñ veteranları iyülniñ 7-nde Qırımda keçirilgen tintüvler sebebinden Aqmescit merkezindeki Qırımnıñ Rusiye ükümetiniñ binasına keldi. Olar Qırımnıñ Rusiye yolbaşçısı Sergey Aksenovnen körüşmege istedi ve afu soramasını talap etti.
Çarşenbe künü, iyülniñ 8-nde, Aqmescitteki Rusiye mahkemesi iyülniñ 7-nde tutulğan bir qaç musulmannı apiske aldı.
Tintüvler iyülniñ 7-nde saba erte yedi qırımlınıñ evinde keçirildi: Qurman rayonınıñ Büyük Onlar qasabasında yaşağan Emil Ziyadinov, Aqmescit rayonınıñ Kurtsı qasabasında yaşağan İsmet İbragimov, Bağçasaray rayonınıñ Jeleznodorojnoye köyünde yaşağan Seyran Hayretdinov, Bağçasaray rayonınıñ Sevastyanovka köyünde yaşağan Aleksandr Sizikov, Aqmescit rayonınıñ Bavurçı (Kamenka) qasabasında yaşağan Vadim Bektemirov ve Aluştada yaşağan Dilâver Memetovnıñevinde. Memetov tintüv vaqtında evde yoq edi, onı qıdırmağa devam eteler.
Rusiye FSBsiniñ malümatına köre, «Qırım sakinleri arasında terror mefküresini yayğan, qırımlı musulmanlarnı özüne celp etken» «Hizb ut-Tahrir» bölügini qurğanından ve iştirak etkeninden şübheli sayılğanlar tutuldı. Rusiye mahsus hızmetiniñ matbuat hızmeti bildirgenine köre, «(teşkilât) azalarınıñ yaşağan yerlerinde Rusiyede yasaqlanğan «Hizb ut-Tahrir al-İslami» propaganda malümatı, terror faaliyeti vaqtında qullanğan elektron malümat taşıyıcıları» alındı.
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
