AQMESCİT – Rusiyeniñ Ukrayınağa qarşı arbiy istilâsına faal qoltutqan Rusiye tarafdarı Eyvaz Umerov Aqmescit SİZOsında açlıq tuta. Anda Moskva kontrolindeki mahkemeniñ ükmüne qarşı istinaf arizası baqıla, ükümge köre, o, «iş vekâletlerinden tış» areket etkeni içün üç yılğa üküm etildi. Umerov federal seviyedeki memurlarnıñ diqqatını celp etkenine qadar açlıq tutacaq ola. Qırım.Aqiqat, qırımlı aq qorçalayıcılar ve faallerniñ Rusiye tarafdarınıñ taqdirinen bağlı fikirlerini soradı.
Eyvaz Umerov eki aftadan berli açlıq tuta, tek suv ve ilâc içe. Emin ki, Moskva kontrolindeki Qırım Yuqarı mahkemesi «ükümni deñişmesiz qaldırdı, çünki qabarcılıq ve aqrabalıq Qırım akimiyetine terenden tesir etti». Şunıñ içün Rusiye tarafdarı faal federal seviyede davağa diqqat celp etmege tırışa.
«Açlıq ola bilgeni qadar raat keçe. 17 kg ketti. Baş ve yürek ağrılarımnı duanen tedaviylemege tırışa. SİZOda tibbiy yardım seviyesi minimal, tek tsitramon bere bileler. Açlıq belli bir stress yapsa da, onı tutmağa mecbur oldım, çünki aq, serbestligim ve ayatımnı qoruycaq vastalar çoq degil! Uydurılğan cinaiy davağa federal memurlar ve aq qorçalayıcılar kirişkenine qadar açlıq tutmağa niyetlenem», – dep bildirdi Eyvaz Umerov.
Aq qorçalayıcı ve advokat Nikolay Polozov Qırım.Aqiqatqa izaat berip, «cenk vaziyetinde Rusiye akimiyetiniñ Eyvaz Umerovğa cevap bermege istegi yoqtır, tek Rusiye tarafında cenkleşmege teklif ete bileler».
Evelden Qırım Muhtar Cumhuriyeti milletlerara ve sürgün etilgen vatandaşlarnıñ işleri Cumhuriyet komitetiniñ reberi olıp çalışqan qırımlı faal Edem Dudakov Qırım.Aqiqatqa Rusiye akimiyeti Umerovnı istegeni kibi areket etkenini afu etmeycek, dep ayttı.
O, halq adından aytıp, propagandacılarğa kerek olğan şeylerni seslendirdiEdem Dudakov
«Eyvaz Umerov – Ahtem Çiygoz ve diger siyasiy davalarda yalan aytqan şaattır. «Musulman saqalı» artında saqlansa da, ceennemde cevap berecek. 2014 senesinden soñ yañı akimiyette kerekli oldı. Pek faal faaliyeti sebebinden olarnıñ dünyasında istenmegen biri oldı. Amma nasıl da güzel başlağan edi – Rusiye kütleviy haberleri aman-aman er kün er sebepten onıñ «kalamburlarını» basqan edi. O, halq adından aytıp, propagandacılarğa kerek olğan şeylerni seslendirdi. Birden kelgen meşurlıqtan aqlını coydı. Özü mahkeme ete bile, dep tüşündi, qırmızı çizgini keçti, amma eñ müim şeyge qulaq asmadı – er angi totalitar akimiyet aveskârlıq sevmey. Böyle etip davanı «qanunğa köre» yibergenler, yerini bilsin ve digerleri de körip örnek olsun dep. «Mavr işini yaptı…», – dep tarif etti faal.
Uquqçı, kefeli aq qorçalayıcı Sergey Mokrenük Qırım.Aqiqatqa izaat berip, açlıq Umerov içün haberlerde qalmağa yardım ete, dep ayttı.
Kerçek rusiyeli olaraq «aqları oğrunda küreşmeli», yani sahte davanı azırlağan memurlarından apishaneden yardım istemeliSergey Mokrenük
«Bu vaziyette netice müim degil – esnas müim. Umerov Rusiye vatanperveri olğanını qayd ete. Kerçek rusiyeli olaraq «aqları oğrunda küreşmeli», yani sahte davanı azırlağan memurlarından apishaneden yardım istemeli. Bıltır kim daa yahşı olğanını köstermek içün başqa bir «vatanpervernen» «küreşken edi». Satqınlarnıñ böyle bir adeti bar – işğalci akimiyetke kim daa çoq hızmet etkenini köstermek içün biri-birinen yarışalar. Böcekler örümçeklernen küreşse, bu güzel bir işaret», – dep izaatladı vaziyetni aq qorçalayıcı.
Halqını sattı, işğalcilernen işbirligi yapıp ve olarğa yardım etip, semetdeşlerine qarşı areket ettiRuslan Seydametov
Ukrayına prezidentiniñ Qırım Muhtar Cumhuriyetindeki temsilciliginde iş tecribesi olğan #LiberateCrimea halqara areketiniñ faali Ruslan Seydametovnıñ fikirince, Umerov açlıq tutıp, bir şeyge irişip olamaycaq .
«Halqını sattı, işğalcilernen işbirligi yapıp ve olarğa yardım etip, semetdeşlerine qarşı areket etti. Halq arasında onı zıncırlı köpeknen qıyaslaylar, saibi ögünde bir şeyler köstermek içün er keske qarşı avlay. Amma diger köpeklernen «avlap qavğa etkeni» içün bir kün saibi onı qafeske oturta. Kimseniñ işi yoq ve olmaycaq. Açlıq tutsa da, tutmasa da, «özüni nasıl alıp baracağını» añlağanına qadar kimse oña qulaq asmay. Ukrayına diger siyasiy mabüsler aqqında tüşüngeni kibi onı tüşünmeycek, çünki Eyvaz Umerov memleketini sattı ve oña qarşı areket etti. Açlıq aqqında aytsaq, Ukrayınağa qarşı cenk başlatqan ve on biñlernen insannı öldürgen Rusiye içün onıñ taqdiri bir şeyge tesir etmey… Bir şey yapıp olamaz», – dep tarif etti Qırım.Aqiqatqa faal.
«Qırım birdemligi» cemaat birleşmesiniñ faali Enver Şerfiyevniñ fikirince, Umerov Rusiye akimiyeti içün «qullanılğan bir şey» oldı.
Rusiyedeki praktika köstergeni kibi, insan sistemağa kerek olmağan olsa, açlıq bir işke yaramazEnver Şerfiyev
«Rusiyedeki praktika köstergeni kibi, insan sistemağa kerek olmağan olsa, açlıq bir işke yaramaz, tek bir şey bar – sahte davağa istinaden mahküm etilgen kişige insanlarnıñ diqqatını celp ete bile. Vatandaş Eyvaz Umerov hain olsa da («rus aleminiñ» tarafdarı), köremiz ki, insan rolüni oynağan olsa, onı çeşit usullarnen çetleştireler», – dep izaatladı vaziyetni Qırım.Aqiqatqa fal.
Sudaqtaki Rusiye memuriyetiniñ sabıq yolbaşçı muavini, Rusiye tarafdarı faal, Rusiyeniñ Ukrayınağa qarşı tam istilâsınıñ tarafdarı Eyvaz Umerov üç yıl koloniyada qalmasına üküm etildi. Qırım mahkemesi onı 2019 senesi iş vekâletlerinden tış areket etkeninde qabaatladı. Eyvaz Umerov «Qırım akimiyetini satqın ve hırsızlardan temizlemek» içün «halq opolçenlerini» quruv aqqında aytqan soñ bu dava kene baqılıp başlandı.
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
