Aqyarda soñki künde üç yañı COVID-19 hastası qayd etildi, olardan biri hastahanede can berdi. Bu aqta Aqyarnıñ Rusiye ükümeti haber ete.
«Eki hasta Aqyarda memleketniñ diger regionlarından keldi, yapılğan taliller koronavirus yuqunçı bar olğanını tasdıqladı. Üçünci hasta bir qaç kün devamında evde tedaviylendi, iyünniñ 29-nda yuqunç hastahanesine ağır alda alındı ve iyünniñ 30-nda vefat etti. COVID-19 diagnozı sağ olğanda ve ölümden soñ yapılğan autopsiya neticesinde tasdıqlandı. Qaydan hastalanğanı ögrenile», – dep aytıla haberde.
Yılnıñ başından Aqyarda 239 insan yañı koronavirus yuqunçına oğradı. Al-azırda 37 insan hastahanede buluna. 189 insan yahşı oldı, 5 kişi vefat etti.
115 kişi yuqunç hastahanesinde közetile, №9 şeer hastahanesinde – 79 kişi. 870 insan yaşağan yerinde közetile. «İzumrud» ve «Solnışko» pansionatları observator olaraq çalışa.
Qırımda iyülniñ 1-nden 4-ne qadar er kün koronavirusqa oğrağan hastalarnıñ vefatı etkeni qayd etile. Soñki künde Qırımda 11 yañı koronavirus hastası qayd etildi.
Daa evel iyülniñ 1-nden itibaren Qırımda koronavirus pandemiyası sebebinden işini toqtatqan akvapark, SPA-kompleksleri ve saunalar açılacaq, dep haber etildi.
Qırım akimiyetiniñ qayd etkenine köre, iyül ayında yarımada milliondan bir buçuq millionğa qadar turistni qabul ete bile. Bu mevsimde Qırımda 400 plâjdan ziyadesini açmağa tüşüneler, akimiyet olar koronavirus pandemiyası şaraitlerinde qırğınlıq ile küreş tedbirlerine riayet etecek, dep işandıra.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
