Qırımda Rusiye uquq qoruyıcıları tarafından tutulğan Alim Karimov aprelniñ 8-nde 25 yaşını toldurdı, onıñ üç aylıq oğlu bar, dep bildire «Qırım birdemligi» cemaat birleşmesi Facebook saifesinde.
Qayd etile ki, Alim Karimov «halqnıñ taqdirine lâqayt qalmağan edi».
«Siyasiy mabüslerniñ qorantalarına yardım etmege tırışqan edi, siyasiy mabüslerge SİZOğa aş yibermeknen oğraşqan edi. İşlerini qaldırıp, halqına yardım etmege aşıqa edi», – dep qayd etti «Qırım birdemligi».
Rusiye uquq qoruyıcıları Karimovnıñ evinde martnıñ 27-nde tintüv keçirip, onı apiske aldı. Karimov ve tevqif etilgen diger qırımtatar faalleri Rusiyede ve işğali altındaki Qırımda terrorist teşkilât olaraq tanılıp yasaqlanğan «Hizb ut-Tahrir» faaliyetin ile alâqaları bar olğanından şübheli sayıla.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi.
Rusiye FSBsi Qırımda tintüvler keçirilgenini tasdıqladı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
