Bazarertesi künü, aprelniñ 5-nde, Rusiyeniñ Rostov-na-Donu Cenübiy okrugınıñ arbiy mahkemesiniñ Aqmescitteki ekinci «Hizb ut-Tahrir davasınıñ» mabüsi Remzi Bekirov onı hususan «etnik ve diniy sebeplerden» taqip eteler, dep ayttı, dep haber ete «Qırım birdemligi».
«2016 senesinden soñ Qırımdaki tintüv ve apiske aluvlarnı aydınlatqan edim, apiste olğanımnı da bunıñnen bağlayım. Meni etnik ve diniy sebeplerden, em de jurnalist faaliyetim içün taqip eteler», – dedi Remzi Bekirov mahkeme oturışuvınıñ teneffüsinde.
O, Qırımda faal cemaatçılıqqa bu şekilde basqı yapıla, dep qoştı: aq qorçalayıcı, jurnalist ve blogerlerge.
Hatırlatamız, martnıñ 22-nde Remzi Bekirov devlet advokatlarından vazgeçkenini bildirdi. Bekirov bunı davanıñ diger mabüsleri adından da yaptı: Riza İzetov, Şaban Umerova, Raim Ayvazov ve Farhod Bazarov.
Rusiyeniñ Rostov-na-Donu Cenübiy okrugı arbiy mahkemesiniñ qadısı martnıñ 16-nda Aqmescitteki ekinci «Hizb ut-Tahrir davasınıñ» mabüslerini tuvğan qırımtatar tilini qullanğanları içün mahkemeden çıqardı.
Daa evel berilgen malümatqa köre, Aqmescitteki «Hizb ut-Tahrir davasınıñ» mabüsleri olğan qırımtatarları Rusiyeniñ Rostov-na-Donu №1 tahqiqat izolâtorına avuştırıldı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
