Rusiyeniñ Cenübiy okrugınıñ arbiy mahkemesi qırımtatar faalleri, «qırımlı musulmanlar davasının» mabüsi Ernes Seytosmanovnı 18 yıl sert rejimli koloniyada qalmasına üküm etti. Bu aqta «Qırım birdemligi» cemaat birleşmesi haber ete.
«İlk dört yılnı Ernes apishanede keçirecek – eñ qıyın şaraitler. Soñra Seytosmanovnı tüzetüv koloniyasına yollaycaqlar. Azat etilgen soñ mahkeme onı bir buçuq yılğa sınırladı», – dep aytıla haberde.
Sıñırlavlar ayda eki kere Rusiye Cezalarnı yerine ketirüv federal hızmetinde qayd olmaq, aqşam 10-dan saba 6-ğa qadar evini terk etmemek, kütleviy tedbirlerni ziyaret etmemek, yaşağan ve çalışqan yerini habersiz deñiştirmemek şartlarından ibarettir.
«O qadar sert bir cezağa baqmadan, doğrusını aytqanda, Ernesten ayrette qalam. Ruhtan tüşmey, yapmağan bir cinayet içün berilgen qorqunç ükümni, eminim, lâyıq bir şekilde qarşılaycaq», – dep izaatladı ükümni advokat Aleksey Ladin.
İmaye ükümni istinaf ve temyiz mahkemelerinde şikâyet etmege istey.
Seytosmanov 2022 senesi fevral ayında Rusiye tintüvlerinden soñ tutuldı. Qırımnıñ bir qaç rayonında Rusiye uquq qoruyıcıları dört insannı tutqan edi: Ansar Osmanov, Marlen Mustafayev, Ernes Seytosmanov ve Amethan Abdulvapov.
Episi Rusiyede terror, amma bir çoq memlekette milliy qanunlar seviyesinde sıñırsız çalışqan «Hizb ut-Tahrir» islâm siyasiy firqasında iştirak etkeninde qabaatlandı. «Memorial» «Hizb ut-Tahrir davasının» mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
