«Fikir» rubrikası, mahsus Qırım.Aqiqat içün
«Azov» komandanlarınıñ azat etilüvi, Qırımnen beraber Ukrayına topraq bütünliginiñ tanıluvı aqqında hatırlatuv, ebet, «zahire añlaşmasını» uzatuv talabı, İsveçiyanıñ NATOğa qoşulmasına qarşı yasağından vazgeçüv ve Ukrayınanıñ Avropaatlantik integratsiyasına qoltutuv. Türkiye prezidentiniñ bu aytqanları ve qararları, şübhesiz, Rusiye zenaatdaşınıñ menfaatlarına ters kele, em de açıq-açıq ura.
Er seferinde Recep Tayyip Erdoğan problemlerni Vladimir Putinnen muzakere etmege azır, dep hatırlata. Putin avgustta Türkiyege kelecek – ve er şeyni muzakere etermiz.
Türkiyede prezident saylavları arfesinde Vladimir Putin Türkiye zenaatdaşınıñ vaziyetini zorlaştırmağa istemegendir
Türkiyede prezident saylavları arfesinde Vladimir Putin Türkiye zenaatdaşınıñ vaziyetini zorlaştırmağa istemegendir, ve sebebini añlaymız. Rusiye prezidenti Erdoğannıñ ğalebesini istegen, dep tüşünem, çünki emin: raqibi Ğarpqa qoltutacaq. İsveçiyanıñ NATO azalığına qarşı çıqmaz, Avropa Birligi aqqında hatırlar, Washingtonğa yaqın olmağa ister. Washington ise Rusiye ile munasebetler aqqında mıtlaqa hatırlatır. Ve Ukrayınağa daa faal qoltutmağa talap eter.
Şunıñ içün Putin vazgeçecek dep qorquzsa da, «zahire añlaşması» kene uzatıldı. Şu sebepten Erdoğannıñ ğalebesi Kremlde raat qarşılandı. Amma bu ğalebeden soñ Putin Türkiye zenaatdaşına başqa bir eyilik yapmaycaq, dep tüşüngendir. Em de Erdoğan Moskvağa kelişken siyasetni devam ettirecektir.
Amma Vladimir Putin Türkiye prezidentini yañlış tanığan, ğaliba. Erdoğan oynamağa bilmese, Erdoğan olmaz edi. Ve Rusiye prezidenti Kemal Kılıçdaroğludan beklegen siyasetni özü yapıp başladı. «Azov» komandanlarını azat etti ve Ukrayınağa qoltutqanını bildirdi. İsveçiyanı NATOğa qabul etilüv blokunı attı. Avropa Birligi aqqında bile hatırladı, tasavvur etiñiz!
Vladimir Putin Türkiye prezidentini yañlış tanığan, ğaliba. Erdoğan oynamağa bilmese, Erdoğan olmaz edi
Türkiye prezidenti Rusiye prezidentine böyle bir şey ayta: menfaatlarıma qarşı çıqma, çünki bir kün er şey tanılmaycaq alğa qadar deñişe bile. Ebet, Erdoğanğa «zahire añlaşması» kerek, em repetitsiya, em iqtisadiyat ceetinden. O, Türkiyeni «zahire habına» çevirmege istey, añlaşma ise cenk vaqtında olğan yekâne diplomatik neticedir.
Amma Vladimir Putin de Recep Erdoğannen munasebetleriniñ qıymetini bilmeli. Çünki Türkiye Rusiye bayları ve memurları, para ve yahtalarına maliy sığınaq berdi. Türkiye ava şirketleriniñ uçaqları Rusiyege uçmağa devam ete. Rusiye turistleri Türkiye kurortlarında raatlana. Ve bular er daqqa bite bile – Erdoğan Putin onı diñlemege istemegenini tüşünse.
Rusiye prezidenti içün Türkiye zenaatdaşı ile hususiy munasebetleri ne qadar müim, Vladimir Putin siyasiy yeterliligini saqlap qaldımı ve tek signal bermek degil, digerleriniñ signallarını da alamı eñ yaqın aftalarda bilecekmiz. Mence, al-azırda Erdoğan Putinge degil de, daa çoq Putin Erdoğanğa bağlı.
Vitaliy Portnikov – jurnalist ve siyasiy izaatçı, Azatlıq Radiosı ve Qırım.Aqiqat müellifi
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.