Türkiye prezidenti Recep Tayyip Erdoğan Ukraina lideri Volodımır Zelenskıynen muzakereler keçirmek içün fevralniñ 3-nde Kyivge kelecek, dep haber ete Ukraina prezidenti ofisiniñ matbuat hızmeti.
Erdoğannıñ Ukraina ziyareti resmiy olacaq.
Berilgen malümatqa köre, saat 13:00-da prezidentler körüşüviniñ resmiy tantanası Mariyınskıy sarayında ötkerilecek. Saat 15:25-ke Zelenskıy ve Erdoğannıñ kütleviy haber vastalarınıñ vekillerinen körüşüv keçirilüvi planlaştırıla.
Prezident Volodımır Zelenskıynıñ vekili Serğiy Nikiforov Erdoğannıñ Ukraina-Türkiye Strategik şurası çerçivesinde planlaştırılğan ziyaret çerçivesinde Ukrainağa kelecek, dep Azatlıq Radiosına bildirgen edi. Faqat tam künü daa belli degil edi.
Türkiye prezidenti de ziyaretini ilân etken edi.
Keçken ay Erdoğan Moskvanı Ukrainağa yañı tecavuzdan saqındırdı ve Rusiyeniñ Ukrainağa yañı tecavuzını «kerçekçi bir variant» olaraq saymağanını bildirdi.
Onıñ aytqanına köre, Ukraina «küçlü bir memleket» ola. «Rusiyeniñ Ukrainağa tecavuzını kerçekçi bir variant olaraq körmeyim, çünki bu adiy bir memleket degil», – dep qayd etti Erdoğan.
Türkiye prezidentiniñ aytqanına köre, Rusiye qarar bermezden evel «dünyadaki ve memleketi içindeki» vaziyetni talil etmeli. O, region artıq cenkke razı olamaz ve böyle adım yañlış olur, dep qoştı.
Erdoğannıñ spikeri, Türkiye prezidenti Ukraina ve Rusiye prezidentleri Volodımır Zelenskıy ve Vladimir Putinnen laf etip, ekisini de Türkiyede körüşmege davet etti, dep bildirdi.
Erdoğannıñ vekili, Türkiye «aqibetleri büyük ve eskisi kibi olmaycaq er angi cenk areketlerine yol bermemek içün» Rusiye ve Ukraina arasında kerginlikni eksiltmek içün rol almağa azır, dep bildirdi.
Ukraina prezidentiniñ ofisi Azatlıq Radiosına bildirgenine köre, Türkiye prezidenti Recep Tayyip Erdoğannıñ Rusiye ve Ukraina prezidentlerini muzakerege davet etmek teşebbüsi yañı degil.
«Türkiye Bir-eki ay evelsi de davet etken edi, ve Rusiye böyle format olarğa meraqlı degil, dep cevap berdi endi», – dep ayttı prezident Volodımır Zelenskıynıñ spikeri Sergey Nikiforov.
Onıñ aytqanına köre, Zelenskıynıñ böyle körüşüvlernen bağlı fikri deñişmey: «Ukraina ABD vastalığı, Türkiye vastalığı ile er angi formatta laf etmege azır. Neticesi olacaq er angi format ola bile».
