Türkiye «Filistin-İsrail zıddiyetini toqtatmaq içün er angi aracılıq şekline» azır, dep bildirdi prezident Recep Tayyip Erdoğan.
«Türkiye olaraq er angi aracılıqqa azırmız, şu cümleden, taraflar talap etse, esirlerni deñişüvge de… İsrail ve Filistin arasında barışıq olması içün intensiv diplomatik bağlarımıznı devam ettiremiz», – dep ayttı Erdoğan Ankarada ükümet toplaşuvından soñ.
Türkiye prezidenti İsrailni «Filistin topraqlarınıñ bombardımanını, filistinlilerni ise İsrailde vatandaş qasabalarını taqip etmesini toqtatmalarına» çağırdı.
«İsrail ve Filistin arasında barışıq içün intensiv diplomatik bağlarımıznı devam ettiremiz… Cenkte bile edep ve ahlâq bar. Taraflar olarğa riayet etmeli. Qayd etemiz ki, adaletli dünyada yutqan yoq», – dedi Türkiye lideri.
Gazzeni kontrol etken HAMAS oktâbrniñ 7-nde saba İsrailge ücüm etti. Olar üç biñge yaqın raketa attı ve sıñırdaki rayonlarğa kirip, İsrail arbiylerinen çatıştı ve onlarnen reine aldı. «Hezbolla» gruppirovkası Lübnan tarafından İsrailge ateş açtı. İsrail mudafaa ordusı cevap olaraq darbeler endirdi.
HAMASnıñ ücümi neticesinde 800 israilli elâk oldı, dep haber etti oktâbrniñ 9-nda The Times of Israel neşiri.
İsrail Sağlıq nazirligi bildirgenine köre, oktâbrniñ 9-nda kündüz 2506 yaralanğan hastahanege ketirildi, 23-ü kritik alda ve 353 kişiniñ alı ağır.
HAMAS kontrolindeki sağlıq nazirliginiñ malümatına köre, Gazzede elâk olğanlarnıñ sayısı 560 ola, daa 2900 kişi yaralandı.
Oktâbrniñ 9-nda İsrail Mudafaa ordusınıñ spikeri Daniel Hagari İsrail ordusı Gazze sıñırındaki bütün şeerlerini kontrol altına qaytardı, dep bildirdi. Onıñ aytqanına köre, soñki saatlarda çatışmalar pek az edi.
İsrail Mudafaa naziri Yoav Galant İsrail ordusı Gazzeniñ tolu muasarasını temin etecek, dep ilân etti. «Ne elektrik, ne aş, ne yaqarlıq olacaq», – dep qayd etti o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
