Türkiye prezidenti Recep Tayin Erdoğan BMT BA 76-ncı sessiyasında çıqışta bulunıp, Türkiye Qırımnıñ ilhaqını tanımaycağını ve Ukraina topraq bütünligini desteklegenini bildirdi.
«Biz Ukraina topraq bütünliginiñ ve suverenitetiniñ mudafaasını müim sayamız, hususan Qırımnıñ Rusiye tarafından işğalini qabul etmeymiz», - «İnterfaks» Rusiye neşri Erdoğannıñ aytqanlarından alıntı ketire.
Evel, Türkiye Tış işler naziri Qırımda keçirilgen Rusiye Devlet dumasınıñ saylav neticelerini tanımay, dep haber etti nazirlikniñ matbuat hızmeti.
Daa evel Ukraina prezidentiniñ matbuat kâtibi Sergiy Nikiforov, Volodımır Zelenskıy ABD-de Türkiye prezidenti Recep Tayip Erdoğan ile körüşüv vaqtında Rusiye taqip etken qırımtatarlarnıñ cedvelini berip, olarnıñ azat etilmesinde yardım etmesini isteycek, dep bildirdi.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
