Türkiye, Rusiye ve Ukraina munasebetlerinde kerginlikni eksiltüvde issesini qoşmağa azır, dep bildirdi prezident Recep Tayyip Erdoğan onı Aşhabattaki İqtisadiy işbirligi teşkilâtınıñ sammitinde olğan jurnalistlerge. Bu aqta «Anadolu agentligi» haber ete.
Türkiye prezidentiniñ aytqanına köre, bunıñ içün Ankara em Ukraina tarafı, em Rusiye prezidenti Vladimir Putinnen «alâqalar qurdı».
«Ukrainadaki vaziyetnen bağlı fikrimiz er keske belli. Türkiye qırımtatarlarnıñ vaziyetini qayd etip, barışıq temin etilmesini istey. Biz bu meseleni bizge dost olğan Rusiyenen çoq laf ettik. Alâqalar devam ete. Region cenk meydanına çevirilmez ve barışıq tiklenir, dep ümüt etemiz. Ankara esnaslarnıñ müsbet inkişafına qoltuta. Türkiye işbirligine azır. Bu meseleni taraflarnen muzakere etmege azır», – dep bildire Erdoğannıñ aytqanlarını agentlik.
Ukraina prezidenti Volodımır Zelenskıynıñ noyabrniñ 26-nda olıp keçken matbuat konferentsiyasında bildirgenine köre, Kyiv Türkiye prezidenti Recep Tayyip Erdoğan vastasınen Vladimir Putinge Ukraina azat etilüvini beklegen ukrainalı siyasiy mabüslerniñ cedvelini berdi.
«(Siyasiy mabüsler – QA) Cedvel Türkiyege berildi. Yaqında prezident Erdoğannen laf ettim. Rusiye prezidentinen körüşti ve alâqa gruppaları seviyesinde cedveller Rusiye tarafına berildi. Oña (Erdoğanğa – QA) teşekkürler bildirmege isteyim, çünki o, bunı rica etti, umumen ayttı, amma qırımtatarlarğa diqqat ayırdı, çünki bu onıñ şahsiy meselesidir. (Rusiyeden – QA) cevap bekleymiz, amma şimdilik yoq», – dedi Zelenskıy.
Rusiye prezidentiniñ matbuat kâtibi Dmitriy Peskov Zelenskıynıñ malümatını tefsir etmedi.
Zelenskıynıñ Qırım kütleviy haber vastalarına bildirgenine köre, Kreml ukrainalı siyasiy mabüslerni, hususan qırımlılarnıñ Rusiye apsinden azat etüv esnasını «aqsata», dep aytqan edi.
Ukraina Yuqarı Radasınıñ insan aqları vekâletlisi Lüdmila Denisova Ukraina ve Rusiye arasında tutulğan şahıslarnı deñişüv muzakereleri Rusiye akimiyeti sebebinden aman-aman toqtatıldı, dep qayd etken edi.
Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirgen edi. Qırımnıñ Rusiye yolbaşçısı Sergey Aksenov Qırımda siyasiy mabüsler «kesen-kes yoq», dep israr ete.
Soñki vaqıtları Rusiye askerleriniñ sayısı Ukraina sıñırında artqanı içün vaziyet kerginleşe bile, dep muzakere etile. Bu aqta Ğarp da ayta.
Keçken afta Bloomberg haber agentligi Amerika istihbaratına esaslanıp, Rusiye, Ukraina sıñırında arbiy tehnikanı arttırıp, Qırımğa faal sürette asker yollay, dep bildirdi.
