Qırımda doğuv seviyesi eksile, ölüm seviyesi ise yüksele, böyle malümatnı Aqmescitniñ rusiyeli memuriyetiniñ saytında derc etilgen "2019 senesi yanvar-mayıs aylarında Qırımnıñ içtimaiy ve iqtisadiy alı" marusazı taqdim etti.
Vesiqağa köre, 2019 senesiniñ yanvar-aprel aylarında yarımadada 6019 doğdı, 9601 adam öldi. Ealiniñ tabiiy eksilmesi, keçken yılnıñ aynı müddetinde olğanına köre, 20,2%-ğa arttı. Mayısnıñ 1-inde Qırımda 1 million 910 biñ 400 kişi yaşay edi.
Qırım siyasetşınası Dmitriy Ömelçük, nufusnıñ eksilmesi - Qırım sağlıq müessiselerinde olğan meselelerge ve qıyınlıqlarğa bağlıdır, dep saya.
Qırımda daima pansiyalılar çoqluq edi. Adamlar tabiiy sebeplerden kete. Amma muzakere eticelek başqa bir müim mesele - bu tibbiyet
- Ölüm içün eali azlaşa, dep taaciplenmege kerekmey - Qırımda daima pansiyalılar çoqluq edi. Adamlar tabiiy sebeplerden kete. Amma muzakere eticelek başqa bir müim mesele - bu tibbiyet. Bir taraftan, sanki er şey yahşı, amma kerçekten ise, mediklerniñ meseleleri aqqında bayağı laf etile, çünki mütehassıs olğan ekimler kapiklik aylıq içün çalışmağa azır degiller ve Rusiyege keteler. Şahsiy klinikalarda çalışqan tanışlarım, soñki bir-bir yarım yılda, bu müessiselerge muracaat etken adamlarnıñ sayısı eksildi, dep ayta. Sağlamca olğanları içün degil - Rusiyeniñ eñ büyük meselelerinden birisi olğan fuqarelik bir yerge coyulmağanı içün. O, adamlar öz sağlığına diqqat etmelerine de tesir ete.
Dmitriy Omelçük, bundan ğayrı, yarımada aylıqlarına köre, özüne daa yahşı qazanç qıdırğan yaş, işke yarağan gençler Qırımdan ketkenini de qayd ete.
İçtimaiyat professorı, demografiya ilimlerniñ doktorı, Ukraina Milliy ilimler akademiyasınıñ İçtimaiyat İnstitutınıñ hadimi İrina Pribıtkova, böyle vaziyette Qırımnıñ demografik köstergiçleri daa beter olmaq mümkün edi, dep saya.
Yaşayış keyfiyetiniñ yaramaylaşmasınıñ alâmetleri - nufusnıñ eksilmesi ve onıñ belli yerden ketmesidir. Bu, Qırımda körgenimizdir
- Bu maruzağa köre, Qırımnıñ nufsu 2019 senesiniñ yanvar ayından mayısqace 1465 kişige eksildi. Bu çoq degil. Aynı vaqıtta müsbet migratsiya balansı 2117 adam oldı, bundan sebep, Qırımnıñ sekiz bölgesinde eali çoqlaştı. Qorqunçlı şey mında körmeyim, menn daa ciddiy raqamlar olur, dep belledim. Buña - yaşayış keyfiyetiniñ yaramaylaşması deyler - ealiniñ şahsiy, gruppa ya kütleviy qıymet kesüvi, yani o özü nasıl körgenidir. Yaşayış keyfiyetiniñ yaramaylaşmasınıñ alâmetleri - nufusnıñ eksilmesi ve onıñ belli yerden ketmesidir. Bu Qırımda körgenimizdir, tek şimdi o arbiy ve deñiz bazası oldı, ve daima kontingen deñişmesi ola. Çoqusı qorantalarnen kelip, mınta bala tapa, böylece nufus arta.
Qırım tarihçisi Aleksandr Sevastyanov, yarımada, Ukrainanıñ vaqtınca işğal etilgen toprağı kibi oğrağan sanktsiyalarnı da qayd ete.
Qırımlılarnıñ ketmesi - soñki 5 yılnıñ köstergiçleridir. Böyle yerler daima er taraftan depressiv ola
- Bugün Qırımda olğan vaziyette genç, işke yarağan, faal adamlar, yarımdada özleri içün perspektiva körmey. Soñki beş yılda Qırımda alınğan tasil diplomlarını bir yerde qullanıp olacaqlarına kefalet yoq, çünki Qırım diplomları pek şübeli. Olar biznes inkişafı perspektivalarını körmey, çünki "boz zona" şaraitinde onı inkişaf ettirmesinde perspektiva yoq. Bunıñ içün, içtimaiy ilerlevge qabiliyeti olğanlar, başqa yerde inkişaf etmek ve bala doğurmaq içün, Qırımnı terk ete. Bundan ğayrı, Rusiyeniñ başqa bölgeleriniñ arasında, Qırım, kelir seviyesi köre 76 yerni aldı degen malümat bar. İşte, bu da, adamlar özleri içün, qazanmaq ve inkişaf etmek içün daa yahşı şarait qıdırğanını tasdıqlar. Qırımlılarnıñ ketmesi - soñki 5 yılnıñ köstergiçleridir. Böyle yerler daima er taraftan depressiv ola.
"Qırım Statistikası"nıñ reberi Olda Baldina ise, 2019 senesi martta "Rossiya segodnâ" mediasında matbuat konferentsiyasında, soñki beş yıl içinde Rusiye nezareti altında ve, hususan, migratsiyadan sebep, Qırım ealisi 70 biñ adamğa arttı, dep bildirdi.
"Soñki beş yıl içinde Qırım cumhuriyetiniñ nufsu 20,4 biñ adamğa arttı ve 2019 senesi yanvar 1-inde 1,9 million adam oldı, Aqyarnıñ - 49,9 biñge ve 443,2 adam oldı... Qırım cumhuriyetinde müsbet migratsiya balansı 56,8 biñ adamdır, Aqyarda - 60,9 biñ. Qırımğa, ekseriyette, Aqyar, Moskova, Moskova vilâyeti, Sankt-Peterburg ve Krasnodardan kele ediler. Aqyarğa çoqusı Krasnodar, Sankt-Peterburg ve Moskovadan köçe ediler".
Baldina, resmiy malümatqa köre, soñki beş yıl içinde Qırım ve Aqyarda orta yaşayış devamlığı arrtı, dep bildirdi: Qırımda 70,7-den 72-gece, Aqyarda - 72,2-den 73,3-kece.
(Metinni Vladislav Lentsev azırladı)
