Dekabr 5-inde Rusiye kontrolindeki Qarasuvbazar rayon mahkemesi, «Taygan» arslanlar parkınıñ işini 30 künge toqtattı, şimdilik parknıñ kirişi müürlengen.
Bunı Qırım.Aqiqatqa parknıñ saibi Qırım iş adamı Oleg Zubkov haber etti.
"Mahkeme, satlıqtan çıqarılğan ve ayvanat bağçasına yollanılğan turna balığı ve daa 600 gramm suvutılğan balıqnı ayuvlarğa aşatqanımız içün, parknıñ işini 30 künge toqtatmağa qarar berdi. Ekinci sebep - Krasnodardan kelgen 1 tonna 200 kilogramm tuvar eti - onıñ da satlıq müddeti bitken edi ve veterinar şeadetnamesi bar edi. Etni ayuvlarğa aşattıq - er şey yahşı. Kimse zarar körmedi. Amma veterinarlar, bu ciddiy bozma dep, bizni qabaatladı. Biz ayvanlarnıñ sağlığını telüke astına qoyğan ekenmiz, bundan memuriy dava yapıp, parknı bir ayğa qapattılar", - dep haber etti Zubkov.
Onıñ aytqanına köre, mahkeme icracıları "Taygan" arslanlar parkını endi müürledi.
«Qarar birden işke tüşürildi. Daa parkqa kelmedim, vekiller qapı, kassa, kirişlerni endi müürledi. Er şey qapalı», – dedi Zubkov.
"Krıminform" Qırım haber agentligine Qırım veterinariya komitetiniñ reisi Valeriy İvanov bildirgeni kibi, qarar, Rusiye Memuriy cinayetler kodeksiniñ 19.3 maddesiniñ 1-inci qısmına köre tizilgen protokolnıñ baqılğanından soñ qabul etildi.
Noyabrniñ 14-nde Zubkov, mahkeme park işini toqtatsa, 30 ayuvnı öldürmege mecbur olacaq, dep bildirdi. Qırımnıñ rusiyeli Tabiat Nazirligi, Zubkovnıñ ayuvlarnıñ ihtimallı "atuvı ya da evtanaziyası" aqqında aytqanı içün, qanun bozmasında saqındırdı.
Kreml kontrolindeki Yalta mahkemesi noyabrniñ 21-nde Oleg Zubkovdan ayvanlarnı musadere etüv davasını baqmağa başladı.
2014 senesi Rusiyeniñ yarımada ilhaqına qoltutqan qırımlı iş adamı Oleg Zubkovnıñ Qırımnıñ Rusiye akimiyetinen zıddiyeti bar. Oleg Zubkov, mal-mülki bulunğan topraq damartılarınıñ vesiqalarını beş yıldan berli resmiyleştirip olamay, dep bildire.
Qırım işğali devamında Zubkov Kreml kontrolindeki Qırım akimiyeti tarafından oña nisbeten para cezaları ve qabaatlavlarnen bağlı tahminen 500 mahkeme oturışuvına bardı.
