Rusiye TİN-inde bildirdiler ki, yanvarniñ 31-nde BMT Halqara mahkemesi 2017 senesi yanvar ayında Ukrayina tarafından teşebbüs etilgen halqara ırq ayırımınıñ bütün şekillerini yoq etüv konventsiyası esasında Rusiyege qarşı dava boyunca qararında "Rusiyeniñ siyaseti Konvensiya çerçivesindeki mecburiyetlerge uyğundır" ve "Qırımda qırımtatarlar ve ukrayinlerge qarşı ayırım yoq", Qırımtatar halqı Qurultayı ise "iş vazifelerini eda etmege devam ete", dep tanıdı. Qırım.Aqiqat qırımtatar ekspertleri ve liderleriniñ fikirlerini ögrenmege qarar berdi.
Rusiye Tış işler nazirligi bildire ki, "Kıyiv" "Hizb ut-Tahrir" terror teşkilâtı ve "Tabliğ Cemaatı" ve "Qırımtatar Milliy Meclisi" ekstremistik teşkilâtlarınıñ azalarına qarşı uquq qoruyıcı tedbirlerni bermege tırıştı.
''Mahkeme, Konvensiya ve Rusiyede ekstremist teşkilât olaraq tanılğan "Meclis"niñ yasaq etilmesine nisbeten bozuvlar olmasını körmedi. Qararda qayd etilgenine köre, qırımtatarlarnıñ temsiliy organı Qurultay ola, o, yasaq etilmedi ve Qırımda öz vazifelerini eda etmege devam ete", - dep qayd ettiler Rusiye TİN-de.
Şimdi tek kerçekke degil de, halqara mahkemeniñ qararlarına da esaslana bilemizVladimir Konstantinov
Gaagadaki BM Halqara mahkemesiniñ qararı Kremlniñ Qırım tarafdarlarını bile şaşırttı.
''Halqara müessiselerniñ qıymet kesüv ve areketlerinde obyektivlik olmasına alışqan olsaq da, bu sefer mahkeme körünip turğan şeyni tanıdı... Şimdi tek kerçekke (muhalifetçilerimizniñ problemleri bar) degil de, halqara mahkemeniñ qararlarına da esaslana bilemiz", - dep bildirdi Qırımnıñ Rusiye parlamentiniñ spikeri Vladimir Konstantinov.
Mahkeme esnası Ukrayinanıñ zemaneviy Rusiyeniñ Qırımı aqqında iç bir şey bilmegenini kösterdiİbraim Şirin
Mahkeme şaatı, Qırımnıñ Rusiye cemaat palatasınıñ milletlerara, dinlerara munasebetler ve halqara diplomatiya meseleleri boyunca komissiyasınıñ reisi İbraim Şirin, Rusiye tarafı "zemaneviy Qırımnıñ ayatı aqqında tolu malümat berdi", dep tarif etti.
''Biz mahkemege bugün yarımadada çıqqan Qırım halqlarınıñ tillerinde bütün kitap ve neşirlerni ketirdik. Bundan da ğayrı, mahkeme esnası Ukrayinanıñ zemaneviy Rusiyeniñ Qırımı aqqında iç bir şey bilmegenini kösterdi. Mahkemeci bile davacılarnıñ vekillerine dedi ki: "Siz bizge yañı deliller, artıq red etilgen faktlardan ğayrı, başqa bir şey köstermeysiñiz, kelecek sefer yañı bir şey aytmağa tırışıñız", - dedi Şirin.
Qırımtatar Milliy Meclisi reisiniñ muavini İlmi Umerov Qırım.Aqiqatqa bergen izaatında qayd etti ki, "Qırımdaki vaziyet bütünley işğalci akimiyetniñ nezareti altında" ve bu qırımtatar halqınıñ temsiliy organınıñ işini imkânsız yapa.
Resmiy şekilde kimse apiske alınmay, olarnı çeşit uydurılğan davalar boyunca mahkeme etelerİlmi Umerov
''Qırımda içtimaiy ağlarda ukrayin tarafdarı olğan "like" içün memuriy ve cinaiy işler açıla. Akimiyet tarafından desteklenmegen er angi teşebbüs red etile ve sert bir şekilde bastırıla, şu cümleden mayıs 18-i Sürgünlik hatıra künü ve iyün 26-sı Qırımtatar bayrağı kününe bağışlanğan [tedbirler]. Qırımtatar tilinde tasil bergen bir buçuq mektep qırımtatarlarnıñ rus tilinde tasil alğan mekteplerine çevirildi. Kerçekten de, Meclis azalığı içün resmiy şekilde kimse apiske alınmay, olarnı çeşit uydurılğan davalar boyunca mahkeme eteler. Dünyağa "ekstremist", "terrorist", "yabancı agent" ve ilâhre olaraq köstermek içün. Qurultay - cemaat teşkilâtı degil, qırımtatar halqınıñ saylanğan temsiliy organıdır. Oña qırımtatarlarnıñ arasında yeterli sayıda rey alğan er bir siyasiy küç kirsetile bile. Meclis azalarını Qurultayda saylaylar. Şimdi onıñ Qırımda faaliyeti imkânsız, onıñ içün alternativ olamaz. Ğalebemizden soñ saylavlarnı teşkil etecekmiz, nevbetteki Qurultaynı keçirecekmiz, bütün milliy qurulışlarnıñ işini ğayrıdan tikleycekmiz", - dep ayttı Meclis reisiniñ muavini.
mahkemede nasıl bir qarar çıqarılsa çıqarılsın, onıñ mehanizmini zorlap yerine ketirmek imkânsızAli Ozenbaş
Qırımtatar halqı Qurultayınıñ Teftiş komissiyasınıñ reisi Ali Ozenbaş Qırım.Aqiqatqa bergen izaatında qırımtatar halqı Qurultayı zemaneviy Qırımda serbest çalışıp olamağanını ayttı.
''Rusiyede iç kimse, bütün halqnıñ milliy öz-özüni idare etüv organı serbest areket etip olamay. Bu tarihiy olaraq bu memleketniñ devlet tertibine zıt kele. BM Halqara mahkemesiniñ qararına kelgende, Ukrayina oña ne içün muracaat etkenini añlamayım. Çünki mahkemede nasıl bir qarar çıqarılsa çıqarılsın, onıñ mehanizmini zorlap yerine ketirmek imkânsızdır'', - dep qayd etti cemaatçı.
Qırımtatar faali, Kremlniñ sabıq siyasiy mabüsi İsmail Ramazanov Qırım.Aqiqatqa bergen izaatında qayd etti ki, işğal etilgen Qırımda qırımtatar halqınıñ Qurultayı yasaq etilmedi, amma onıñ azalarınıñ er angi faaliyeti Rusiye quvetçileriniñ diqqatını celp ete.
Qurultay azalarınıñ bir qısmı öz mevamı içün işğalci rejim tarafından taqip etildiİsmail Ramazanov
''Qırımtatar halqı Qurultayı resmiy olaraq Rusiye akimiyeti tarafından yasaq etilmedi, amma Qurultay azalarınıñ bir qısmı öz mevamı içün işğalci rejim tarafından taqip etildi. Ve, bilgenimiz kibi, on yıldan berli Qırımda Qurultay tarafından teşkil etilgen tedbirler keçirilmey. Menfiy netice - bu da bir netice. Mahkemeniñ kelecek qararı tarafımıznıñ beklegenine uyğun olması içün çalışmaq kerek. İşğalci rejimniñ qurbanlarını, sabıq siyasiy mabüslerni şaat olaraq celp etmek kerek. Meselâ, men er angi halqara meydançıqta şaatlıq etmege azırman. Ukrayina şimdi qırımtatar halqınıñ temsiliy organlarını resmiy seviyede tanımaq, Qırım territoriyasında qırımtatar milliy muhtariyetini meydanğa ketirmek kerek. Bu halqımız içün Ukrayina ve Ukrayina quvetlerine daa ziyade qoltutmaq içün küçlü bir işaret olacaq", - dep izaatladı Qırım.Aqiqatqa faal.
Kefeden qırımtatar faali Osman Osmanov Qırım.Aqiqatqa bergen izaatında bildirdi ki, Rusiye Tış işler nazirliginiñ Qırımtatar Milliy Qurultayınıñ faaliyeti aqqında malümatı kerçekke uymağan.
''Bu tamamınen yalan. Qurultay Qırımda faaliyet köstermey. Delegatlarnıñ bir qısmı Qırımnı terk etti, şunıñ içün, imkânsız bir şey olsa bile, olar Qurultaynı toplamağa tırışacaq ediler, amma qararlarnı qabul etmek içün kvorum yoq", - dep qayd etti faal.
Qırımtatar Milliy Meclisiniñ reisi Refat Çubarov, Ukrayinanıñ Rusiyege qarşı davası boyunca BMT Halqara mahkemesiniñ qararlarını izaatlap, Rusiye BMT mahkemesiniñ Qırımtatar Milliy Meclisiniñ yasağını lâğu etüv qararını "cezasız yerine ketirmey", dep qayd etti.
Ukrayina Tış işler nazirliginiñ elçisi Anton Koreneviç Qırım.Aqiqatqa "Ukrayina Rusiyege qarşı" davası boyunca BMT mahkemesiniñ qararını izaatlap, RF ilk sefer halqara uquqnı bozğan olaraq tanılğanını qayd etti.
Ukrayina ve halqara aq qorçalayıcıları qayd eteler ki, işğal etilgen Qırımdan doğru malümat almaq er yıl daa zor ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
