Ukraina Tış işler naziriniñ birinci muavini Emine Ceppar BM Baş kâtibi António Guterresniñ Qırımdaki insan aqlarv bozuluvlarına dair yañı maruzası derc etilgenine cevap berdi.
Onıñ aytqanına köre, işbu maruza «Qırımda insan aqları teren bozulğanını» isbatlay.
«Maruza hususan işkence, qanunsız apis cezaları, insan hırsızlavları, din kütme serbestligini bozuv faktlarını tasdıqlay. Rusiye BM Baş assambleyasınıñ qarar talaplarını körmemezlikke ura ve BM insan aqları monitoring missiyasına Qırımğa kirmege imkân bermey», – dep yazdı Ceppar Twitterde.
«BM Baş kâtibiniñ «Ukraina, Qırım Muhtar Cumhuriyeti ve Aqyardaki insan aqları vaziyeti» üçünci maruzasını «Qırım platformasınıñ» Ortaq beyannamesinde aks ettirilgen halqara toplulıqnıñ Qırımnı işğalden qurtaruv ğayretleriniñ devamı olaraq baqamız», – dep qoştı o.
BM Baş kâtibiniñ maruzası 2020 senesi iyülniñ 1-nden 2021 senesi iyünniñ 30-na qadar müddetni qavrap ala ve «insan aqları ve halqara gumanitar uquq bozuluvlarını tarif ete»:
- Rusiye Federal telükesizlik hızmetiniñ hadimleri tarafından yapılğanı tahmin etilgen işkence ve sert areket. Qabaatlı olğanlar mesülietke çekilmedi.
- Tutulğan şahıslarnı mahkemege bermek ve Rusiyede azatlıqtan marum etmek içün Qırımdan çıqaruv;
- Tutulğanlarnı ceza izolâtorlarına avuştıruv, hususan uzun müddet devamında bir özlerini qaldıruv;
- Din teşkilâtları ve aypı şahıslarğa qarşı sanktsiyalar, Rusiyeniñ ekstremizm ile küreş qanunları esasında İyegova şaatlarınıñ qabaatlav ükümleri;
- Kütleviy toplaşuvlarnıñ keçirilüvine kirişüv, hususan er angi planlaştırılğan toplaşuvnı keçirmek içün Rusiye akimiyet organlarından izin alınmasını talap etken qanun qaideleri esasında toplaşuv iştirakçilerine berilgen para cezaları ve diger sanktsiyalar.
- Qırımda Rusiye akimiyetine qoltutmağan şahıslarğa qarşı ğıyabiy mahkeme esnasları ve olarnıñ insan aqları saasında halqara standartlarğa zıt kelmesi.
Bunıñ arefesinde Rusiye kütleviy vastaları qırımlı Rusiye senatorı Sergey Tsekovnıñ bu maruzağa bergen cevabını derc etti, o, maruzanı «ihtisaslı degil» dep adlandırdı.
2021 senesi iyün ayında BM Baş kâtibiniñ Qırımdaki insan aqlarına dair ara maruzası derc etilgen edi.
Rusiye Tış işler naziri Sergey Lavrov işğal etilgen Qırımda insan aqları bozula degen laflar uydurıla, dep aytqan edi. 2021 senesi avgustnıñ 26-nda insan aqlarını qorçalağan ve Moskvanı olarnı Qırımğa kirsetmege çağırğan halqara teşkilâtlar yarımadağa Rusiyeden, hususan Keriç köpründen kire bile, dep ayttı.
