«Qırımlı musulmanlar davasınıñ» mabüsi Emil Ziyadinovnıñ mahkeme oturışuvı Rostov-na-Donudaki (Rusiye) Cenübiy okrugınıñ arbiy mahkemesine mina qoyulğanına dair haber sebebinden lâğu etildi. Bu aqta imayege mahkeme kâtibiyeti bildirdi, dep haber ete «Qırım birdemligi» cemaat birleşmesi.
Diñlevler fevralniñ 14-ne qaldırıldı.
Advokat Nazim Şeyhmambetovnıñ aytqanına köre, aynı sebepten onı müvekkili Şaban Umerovnıñ iştiraki ile dava diñlevlerine almadılar.
«Mahkemege Fevqulâde vaziyetler hızmetiniñ hadimleri, köpekli kinologlar, polis ve ekimler keldi. «Qırım birdemliginiñ» koordinatorı Enver Alimov mahkemeden hadimlerniñ yalıñız bir qısmı çıqarıldı, dep bildirdi, o, bazıları maniasız binağa kirgenini kördi», – dep aytıla haberde. Alimov mahkemede alınğan ciddiy telükesizlik tedbirleri aqqında tarif etti.
Qırımdan üç avtobusnen kelgen qırımtatar mabüsleriniñ soy-sopları da mahkemege alınmadı. Bugün mında Qırımdan dört dava baqılacaq edi. Memuriyetniñ qararlarını bilmek içün insanlar soqaqta qala, dep ayttı aq qorçalayıcılar.
Fevralniñ 4-nde kimligi belli olmağanlar Rostov-na-Donu rayon mahkemeleri ve Rostov vilâyetiniñ mahkemesine mina qoyulğanını elektron poçta vastasınen bildirgen edi.
Yanvarniñ 17-nde Rostov-na-Donu Cenübiy okrugınıñ arbiy mahkemesi «Hizb ut-Tahrir davasınıñ» mabüsi, Büyük Onlar qasabasınıñ qırımtatar faali Emil Ziyadinovnıñ apiste qaluv müddetini 2022 senesi mayısnıñ 3-ne qadar uzattı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
