Link açıqlığı

Saatnıñ esas haberi

Elâk olğan qırımtatarlarnıñ abidesi Rusiyeniñ zafer miflerini ve inhisarını red etken edi – Çubarov


Ekinci cian cenki yıllarında elâk olğan qırımtatarlarnıñ adları ile bozulğan tahtalar, Mamaşay, Qırım, 2019 senesi mayısnıñ 9-ı
Ekinci cian cenki yıllarında elâk olğan qırımtatarlarnıñ adları ile bozulğan tahtalar, Mamaşay, Qırım, 2019 senesi mayısnıñ 9-ı

Mayısnıñ 6-nda Ekinci cian cenkinde elâk olğan qırımtatarlarnıñ hatırasına Aqyarnıñ Nahimov rayonındaki Mamaşay (Orlovka) köyünde tiklengen ve kimligi belli olmağan insanlar tarafından sındırılıp bozulğan hatıra tahtaları Rusiyeniñ Ekinci cian cenkindeki zafer miflerini ve monopoliyasını red etken edi.

Bu aqta Qırımtatar Milliy Meclisiniñ reisi Refat Çubarov mayısnıñ 9-nda Facebookta yazdı.

«Olar olarnıñ ğalebe miflerini ve inhisarını red etken abideni bozmaq kerek ediler… Abide mında 1960-ıncı yıllardan berli tura edi, yıllar devamında üstünde tek 6 soyad bar edi, olarnıñ arasında qırımtatarlar yoq edi. Bu köyniñ ealisi ise 1944 senesi mayısnıñ 18-ne qadar aman-aman bütünley qırımtatarlardan ibaret edi», – dep yazdı Çubarov.

Onıñ aytqanına köre, elâk olğanlarnıñ adlarını ebediyleştirmek içün «lâqayt qalmağan insanlar, elâk olğanlarnıñ ve ölgen qaramanlarnıñ tuvğanları çoq çalıştı, olar er bir soyadnı arhiv vesiqalarınen, arbiy komissarlıqlardan alınğan malümatnen, şaatlarnıñ malümatınen isbatladı».

Meclis reisiniñ fikirince, Rusiyeniñ Qırım işğalinden soñ «qırımtatarlarğa qarşı mifler Kreml tarafından kene talap etilip başladı».

«İşğal altındaki Qırımda olıp keçkenlerden adaletli hışım vaziyetinde bile tarafsız olacaq olsañ, Rusiye işğalcileri olarnıñ miflerini tamamen red etken Ekinci cian cenkinde iştirak etken qırımtatarlarnıñ abidesini bozmaq kerek ediler», – dedi o.

Qırımlı jurnalist Ayşe Şulakova viran etilgen tahtalarda 57 qırımtatarınıñ adı bar edi, dep bildirdi.

Qırımnıñ quvet hızmetleri haber derc etilgende adise ve onıñ tahqiqatı aqqında bir malümat paylaşmağan edi.

XS
SM
MD
LG