Aqyarnıñ Nahimov rayonındaki Mamaşay (Orlovka) köyünde kimligi belli olmağanlar üç kün evelsi Ekinci cian cenkinde elâk olğan qırımtatarlarnıñ hatırasına tiklengen hatıra tahtalarını viran etti.
Qırımlı jurnalist Ayşe Şulakovanıñ Facebookta bildirgenine köre, tahtalarda 57 qırımtatarınıñ adı yazılğan.
Crimean Tatars neşiri bildirgenine köre, mayısnıñ 6-nda Mamaşayda 60-ıncı yıllardan berli turğan cenk qaramanları abidesi yañartılğan edi.
«Yerli qırımtatar cemiyetiniñ küçü ve parasınen eki granit tahtası qoşulğan edi. Bundan evel abidede tek 6 elâk olğannıñ adı bar edi, olarnıñ arasında ise qırımtatarlar yoq edi. Lâkin bu köyden bir çoq qırımtatarı cenkke ketken edi. Abideniñ yañartılğan tahtalarında cenkte elâk olğan 64 Mamaşay sakininiñ adı mevcut, olardan 57-si – qırımtatarlardır», – dep aytıla haberde.
Qırımnıñ quvet hızmetleri bu adise aqqında resmiy şekilde haber etmey.
Rusiye işğal etken Qırımda 2014 senesinden soñ «Zafer künü» sovet ve Rusiye bayramı Qızıl Ordu ve sovet halqınıñ natsist Almaniyanı yeñgen bayramı olaraq qayd etilmekte. Ukrainada mayısnıñ 8-nde Hatıra ve barışıq künü olaraq qayd etilmekte, mayısnıñ 9-nda Ekinci cian cenkinde natsizmni yeñüv künü.
