Cuma künü, iyün 5-inde, ekinci Bağçasaray "Hizb ut-Tahrir davası" boyunca mahkeme oturışı devamında iştirakçi Marlev Asanov içün ekinci kere ekim çağırıldı. Oña, qan basqısı keskin sürette deñişkeni içün, tibbiy yardım kerek oldı, bildirdi "Qırım birdemligi" birleşmesine advokat Emil Kurbedinov.
"Saba saat 10-dan berli 8 adam üç kvadrat metrlik 1-inci tahqiqat izolâtorında tutula. Video konferentsiya ile bağ böyle şaraitte keçe. Taş çuvalında ne pencere, ne avalandıruv bar. Şimdi teneffüs ilân etildi. Müşterilerimiz, böyle işkence şaraitinde bulhnmaqnıñ çaresi olmağanından sebep olarğa tibbiy yardım etilsin dep, ekimni çağırtıp oldı. Asanovnıñ qan basqısı köterildi. O tabanğa yattı. 150-ge yaqın Asanovda, 130-ğa yaqın Mustafayevde", - bildirdi Kurbedinov.
Daa evel advokat Emil Kurbedinov, Moskova vilâyetiniñ Vlasiha şeerindeki Arbiy apellâtsiya mahkemesinde apellâtsiya şikâyeti baqılğanda ekinci Bağçasaray "Hizb ut-Tahrir davası"nıñ iştirakçilerini avalandıruvı olmağan penceresiz hanede tutulğanını bildirdi.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
