Ukrayına prezidenti Volodımır Zelenskıy qırımtatar faali, Kremlniñ eski siyasiy mabüsi Edem Bekirovğa Levko Lukyanenko devlet stipendiyasını berdi.
№ 853/2022 buyruq Ukrayına prezidentiniñ saytında derc etildi. Levko Lukyanenko devlet stipendiyası Donetsk, Lugansk vilâyetleriniñ işğal etilgen topraqları ve Qırım Muhtar Cumhuriyetini kontrol etken Rusiye ya da Rusiye memuriyeti tarafından cemaat ya da siyasiy faaliyetleri sebebinden tutulğan Ukrayına vatandaşlarına er ay üç yaşayış azğarı miqdarında berile.
Hatırlatamız, 2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Eski siyasiy mabüs, qırımtatar faali Edem Bekirovnıñ cinaiy davası fevralniñ 19-nda Aqmescitte temelden baqılıp başlandı.
Rusiye kontrolindeki Aqmescit mahkemesi 2021 senesi iyün ayında Edem Bekirovnı 7 yılğa azatlıqtan marum qalmasına ve 150 biñ para cezasını tölemesine üküm etti. Bekirov, bu qararnıñ maqsadı «halqnı qorquzmaq» ola, dep qayd etken edi.
Rusiye Ukrayınağa qarşı büyük istilâ başlatqan soñ işğal etilgen Herson vilâyetiniñ Novooleksiyıvka qasabasında Edem Bekirovnıñ evinde tintüv keçirildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
