Rusiye kontrolindeki Aqmescitniñ Merkeziy rayon mahkemesiniñ qadısı Sergey Demenok Rusiye qabaatlayıcısınıñ Aqmescitte ğıyabiy şekilde mahkeme etilgen qırımtatar faali Edem Bekirovğa qarşı dava boyunca patlayıcı tehnikini tekrar sorğuğa çekmek muracaatını qanaatlendirdi. Bu aqta Qırım.Aqiqat mühbiri bildirdi.
İmaye delillerni kösterdi ve taraflar munaqaşağa keçmege azırlanğan edi. Faqat bugünki oturışuvda qabaatlayıcı, tahqiqat versiyasına köre, Bekirovnıñ davası boyunca gizli şaat patlayıcı madde ile çantanı saqlağan yerni teşkergen patlayıcı tehnikini tekrar sorğuğa çekmek kerek, dep bildirdi.
Şaat iyünniñ 1-ne çağırıldı. Patlayıcı tehnikini sorğuğa çekmege kerek olğanı içün munaqaşa vaqtı başqa künge qaldırıldı. Advokat Aleksey Ladin taraflar bu stadiyağa şaat tekrar sorğuğa çekilgen soñ keçecegini inkâr etmey.
Eski siyasiy mabüs, qırımtatar faali Edem Bekirovnıñ cinaiy davası fevralniñ 19-nda Aqmescitte temelden baqılıp başlandı. Bundan evel Qırım Yuqarı mahkemesi evelki instantsiya mahkemesiniñ qararını deñiştirmeyip, eski siyasiy mabüs, qırımtatar faali Edem Bekirovnı qıdıruvğa ilân etti.
2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Edem Bekirov davası
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
