Aqmescitte ğıyabiy şekilde mahküm etilgen qırımtatar faali Edem Bekirovnıñ davası boyunca munaqaşalar iyünniñ 8-nde olacaq. Bu aqta Qırım.Aqiqat mühbiri Rusiye kontrolindeki Aqmescit Merkeziy rayon mahkemesinden bildire.
İyünniñ 4-nde olıp keçken oturışuvda Bekirovnıñ emrinen azırlanılğan kibi tanıtılğan silâ ve patlayıcı madde yerini patlayıcı tehniki olaraq tedqiq etken şaat tekrar sorğuğa çekildi.
Şaat sorğuğa kelmedi, onıñ yerine mütehassıs olaraq sorğuğa çekilgen diger patlayıcı tehniki keldi.
Advokat Aleksey Ladinniñ aytqanına köre, ekspert bildirgen yekâne şey – trotil patlayıcı madde ola.
İmayeniñ itirazına baqmadan, mahkemede şaat Şümeykonıñ şaatlıqları seslendirildi. O, Edem Bekirovnı sıñırdan Aqmescitte bulunğan yerine qadar alıp ketken edi. Bu şaatlıqqa köre, Bekirovnıñ yanında bir bagaj yoq edi, kiçik çantasında tek ilâcları bar edi ve yolda Qırımda sim-kartı olmağanı içün kimsenen laf etmegen edi.
Bundan ğayrı, mahkemede Edem Bekirovnıñ qızınıñ şaatlığı seslendirildi. Qayd etilgenine köre, aydavcı Bekirovnı onıñ evine ketirdi ve bundan soñ o, anda ya da soy-soplarında edi.
İmaye, gizli şaat «Memetovnıñ» ilk tahqiqatta ve mahkemede bergen şaatlıqları farqlı olğanı içün onı tekrar sorğuğa çekilmesini istedi. Qadı Sergey Demenov muracaatnı qanaatlendirmege razı olmadı ve mahkeme tahqiqatı yekünlendi.
Eski siyasiy mabüs, qırımtatar faali Edem Bekirovnıñ cinaiy davası fevralniñ 19-nda Aqmescitte temelden baqılıp başlandı. Bundan evel Qırım Yuqarı mahkemesi evelki instantsiya mahkemesiniñ qararını deñiştirmeyip, eski siyasiy mabüs, qırımtatar faali Edem Bekirovnı qıdıruvğa ilân etti.
2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Edem Bekirov davası
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
