Ukraina informatsion siyaseti naziriniñ birinci muavini Emine Cepparnıñ Ukraina baş naziri Volodımır Ğroysmannıñ «Ğroysmannıñ ukrain strategiyası» firqasında Ukraina Yuqarı Radasınıñ saylavlarında iştirak etüvi Qırımtatar Milliy Meclisinen muzakere etildi. Bu aqta Emine Ceppar Qırım.Aqiqatqa tarif etti.
Onıñ qayd etkenine köre, o, Qırımnıñ işğalden qurtarıluvı ve qırımtatarlarnıñ Ukraina qanunlarında uquqiy statusınen bağlı meselelerni parlamentte kötermege niyetlene.
«Menim içün eñ büyük motivatsiya Qırımnıñ işğalden qurtarıluvı, işğal altındaki topraqlar meselesi, Ukraina mustaqilliginiñ onıñ bütün topraqlarında ğayrıdan tiklenüvi ola. Bu şeyler meni ileri ketmege aveslendirdi. Parlamentke kirsek, Qırım, qırımtatarlar, qırımtatarlar ukrain uquq alanında kim ola, Ukrainada tamır halqlar meseleleri diqqatımnıñ ortasında olacaq», – dedi Ceppar.
Onıñ qayd etkenine köre, o, Ukraina baş nazirinden teklif alğan soñ Meclis liderlerinen laf etti.
«Onı (teklifni – QA) qabul etmezden evel onı Qırımtatar Milliy Meclisi, hususan Mustafa Cemilevnen muzakere ettim. Bu birleştirilgen qarar edi. Meclisniñ fikri böyle: Qırım mevzusını çeşit demokratik küçler vastasınen tutmaq içün ne qadar çoq qırımtatarı parlamentke kirse, o qadar yahşı», – dep qoştı Ceppar.
Cuma künü, iyünniñ 7-nde, Ukraina baş naziri Volodımır Ğroysman «Ğroysmannıñ ukrain strategiyası» siyasiy küçüniñ birinci onunı taqdim etti. Anda Ukraina informatsion siyaseti naziriniñ birinci muavini Emine Ceppar bar.
Mayısnıñ 23-nde sekizinci çağırılış parlament vekâletlerini vaqtından evel toqtatqan ve saylavlarnı iyülniñ 21-ne belgilegen Ukraina prezidenti Volodımır Zelenskıynıñ buyruğı işke tüşürildi.
Mayısnıñ 30-nda Yuqarı Rada Ğroysmannıñ ükümet başı vazifesinden istifa arizasına qoltutmadı.
Emine Ceppar – ukrainalı jurnalist ve qırımtatar asıllı devlet erbabı. Rusiyeniñ Qırım işğalinden soñ yarımadadan esas Ukrainağa köçmege mecbur oldı. 2016 senesi aprel ayından berli – Ukraina informatsion siyaseti naziriniñ birinci muavini.
