Ukraina baş naziri Volodımır Ğroysman «Ğroysmannıñ ukrain strategiyası» firqasınıñ doquz azasını taqdim etti. Olarnıñ arasında Ukraina informatsion siyaseti naziriniñ birinci muavini Emine Ceppar da bar, dep haber ete Azatlıq Radiosı.
«Tecribeli, añlayışlı ve muvafaqiyetke irişe bilgen taqımımıznıñ ilk onunı taqdim etmege isteyim», – dep ayttı o, cedvelni aydınlatmazdan evel.
«Ğroysmannıñ ukrain strategiyası» firqası cedveliniñ başında kelgenler:
Liliya Ğrınevıç, tasil ve ilim naziri;
Emine Ceppar, informatsion siyaseti naziriniñ muavini;
Oleksandr Sayenko, Nazirler şurasınıñ naziri;
Yevğen Nışçuk, medeniyet naziri;
Pavlo Petrenko, adliye naziri;
Serğiy Marçenko, Prezident memuriyeti yolbaşçısınıñ sabıq muavini;
Andriy Teteruk, «Narodnıy front» halq deputatı ve, Ğroysmannıñ aytqanına köre, telükesizlik ve mudafaa meselelerinden mesüliyetli olacaq;
Pavlo Yablonskıy, Vinnıtsâ şeer şurasınıñ kâtibi;
Viktor Yelenskiy, «Narodnıy front» halq deputatı, medeniyet ve maneviyat meseleleri parlament komitetiniñ reis muavini.
Volodımır Ğroysman öz siyasiy küçü başında parlament saylavlarında iştirak etmek niyeti aqqında mayısnıñ 24-nde bildirgen edi.
Mayısnıñ 30-nda Yuqarı Rada Ğroysmannıñ ükümet başı vazifesinden istifa arizasına qoltutmadı.
Emine Ceppar – ukrainalı jurnalist ve qırımtatar asıllı devlet erbabı. Rusiyeniñ Qırım işğalinden soñ yarımadadan esas Ukrainağa köçmege mecbur oldı. 2016 senesi aprel ayından berli – Ukraina informatsion siyaseti naziriniñ birinci muavini.
