Rusiye kontrolindeki Qırım akimiyeti Qırımnıñ çeşit regionlarında qırımtatar sürgünliginiñ 75 yılına bağışlanğan tedbirlerni keçirmekte.
Qırım.Aqiqat mühbirleriniñ bildirgenine köre, aman-aman bütün regionlarda tedbirler aynı şekilde ötkerile: hatıra taşlarına çeçekler qoyula, mitingler keçirile ve camilerde dualar oqula.
Keriçte mayısnıñ 18-nde qırımtatar halqınıñ vekilleri, student ve mektep talebeleri demiryol vokzalınıñ vokzal ögündeki meydanda tiklengen «Zalımlıq ve zorbalıqqa qarşı» hatıra taşına çeçekler qoydı.
Anda 1944 senesi iç bir qabaatı olmağanda elâk olğanlar aqqında da hatırlattılar. Siyasiy repressiyalarnıñ qurbanları Keriçniñ Cuma Camisinde de dualarnen añıldı.
Keriç memuriyetiniñ temsilcileri bu sene matem tedbirinde çıqışta bulunmayıp, tek hatıra taşına çeçek qoymaqnen sıñırlandı.
Ermeni Bazarda anda sürgünlikniñ 50 yılında tiklengen hatıra taşı yanında elâk olğanlar sessizlik daqqasınen añıldı.
Aqmescitte vokzal ögündeki meydanda, Vernadskiy Qırım federal universitetiniñ botanika bağçası yanındaki sürgünlik qurbanlarınıñ memorialı, Qırım müendislik ve pedagogika universitetiniñ «Ğayrıdan doğuv» memorial kompleksi yanında çeçekler qoyuldı. Anda Rusiye kontrolindeki Qırım ükümetiniñ reisi Sergey Aksenov da iştirak etti.
Yaltada mayısnıñ 18-nde 1944 senesi qırımtatarlar Yaltadan sürgün etilgen yerde, avtovokzalda ve sürgünlik qurbanları memorialında dualar oquldı ve mitingler olıp keçti.
Yalta imamı Osman Topuz dua oquğan soñ tedbir iştirakçilerine Aleksandr Nevskiy Yalta kilsesiniñ yolbaşçısı Adam muracaat etip, Aqmescit ve Qırım mitropoliti Lazarniñ (MP UPK) mektübini oqudı.
Yalta mektep talebeleri matem tedbirleri çerçivesinde sürgünlik aqqında şiirler oqudı. Facialı adiselerniñ hatırasına 75 ava kürresi kökke uçurıldı.
2014 senesine qadar qırımtatarlar sürgünlik yıllığına bağışlanğan çoq biñli matem mitinglerini Aqmescitteki Lenin merkeziy meydanında keçire edi.
2014 senesinden berli Rusiye kontrolindeki Qırım akimiyeti bu yerde matem tedbirleriniñ keçirilmesini yasaq ete. Alternativ aktsiyalar ise politsiyanıñ nezareti altında keçirile.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
