Mayısnıñ 31-nde Docudays UA 21 halqara vesiqalı film festivali başlanacaq. Filmler cedvelinde Ukrayinanıñ bugünki vaqialarına, şu cümleden vaqtınca işğal etilgen topraqlarğa bağışlanğan bir çoq film bar. Qırım.Aqiqat taqımı "Sessiz sürgünlik" filmi ile festivalde iştirak ete.
Ukrayina vesiqalı kinosı ve vaqtınca işğal etilgen Qırımnıñ anda yeri aqqında alıp barıcı Sergey Mokruşin Qırım.Aqiqat Radiosınıñ efirinde Docudays UA uquq qorçalayıcı departamentiniñ müdiri Kseniya Şimanskaya ve jurnalist, "Sessiz sürgünlik" filminiñ prodüseri Elvina Seytbullayevanen laf etti
Bu sene Docudays UA festivaliniñ merkeziy mevzusı: "300 yıl devam etken üç künlük cenkniñ 10 yılı". Teşkilâtçılarnıñ añlatqanına köre, olar "öz-özüni teşkergen, hatırlağan, yañlışqan, biraz istiza etken, zıddiyetlernen tolu uzun bir ad sayladılar".
Docudays UA programmasında 34 memleketten 62 film bar. Amma festival tek filmler aqqında degil, dep ayta Docudays UA uquq qoruyıcılar departamentiniñ müdiri Kseniya Şimanskaya.
"Bizde tek kino programması degil de, sanat programması da bar. Böyle bir bediiy diqqatnen, sananen çalışqan bölüklerara programma, onıñ çeşit-çeşit yañı fikirlerinen", — dep ayta müdir.
Kseniya Şimanskaya özü aq qorçalayıcı programmanı idare ete. Şimdi planlaştırılğan munaqaşalarnıñ esas mevzusı — Ukrayina çetelde cenk aqqında açıqtan-açıq aytmaq aqqı içün nasıl küreşkenidir, dedi o.
"Aqiqatta, doğrudan-doğru Qırımnen bağlı olğanlarnıñ arasında, biz destekleycek eki aktsiyamız olacaq. Bu Vatandaşlıq Azatlıqları Merkeziniñ Prisoner's Voice aktsiyası. Biz adet üzre bu kampaniyanı destekleymiz, ve bu yıl festival çerçivesinde biz halqara Qızıl Haç Komitetine, şimdi esirlikte tutulğan insanlarnen bağ qurmağa yardım etmesi içün ariza yazmaqnı rica etecekmiz. Bundan da ğayrı, biz ZMINA insan aqları merkeziniñ kampaniyasına qol tutacaqmız. Ve olarnıñ da bir kampaniyası bar, yazıq ki, adetke çevirilgen - siyasiy mabüslerge mektüpler yazmaq. Bu bizim ortaqlarımızğa köstergen küçük bir destegiñiz, bu endi ananeviy oldı", — dep ayttı Şimanskaya.
Bundan da ğayrı, iyün 1-de RIGHTS NOW! "Qırım ve Ukrayina: tarih közünden özgünlik" subeti olacaq. Medeniyetşınas Elmira Ablâlimova ve tarihçı Gülnara Abdulayeva işğal etilgen yarımada ile bağlar, Qırım ve esas Ukrayinanı birleştirgen medeniy ve tarihiy toplulıqlar aqqında ikâye etecekler.
İyün 2-de Qırım.Aqiqat taqımı çıqarğan "Sessiz sürgünlik" filmi kösterilecek.
"Saba "Sessiz sürgünlik" filmini baqmaq imkânımız olacaq. Ve soñra muzakere etecekmiz. Ve bu subetni mıtlaqa ziyaret etmekni tevsiye etem, çünki anda sürgünlik meselesini ögrengen ekspertler olacaq, ve bu, teessüf ki, ilk sefer degil. Ve film müellifleri de olacaq, bu pek siyrek bir şey, anda em mütehassıslar, em müelliflernen körüşip, film nasıl yapılğanını soramaq mümkün. Bu pek meraqlı bir subet olmalı".
"Sessiz sürgünlik" içün bu birinci yarış ve festival degil. Aprel ayında Qırım.Aqiqat leyhasınıñ vesiqalı filmi ABDde New York Festivals telekino mukâfatınıñ altın mukâfatını aldı.
Mayıs ayında Çeh paytahtında levhanıñ resmiy numayışı olıp keçti. Pragada film çeh tilinde subtitrlernen seyircilerge kösterildi. Filmniñ prodüseri Elvina Seitbullayeva bildire ki, onı Litvaniya ve Qazahistanda da kösterdiler.
"Bizim içün bu pek müim, çünki kerçek insanlarnıñ ikâyeleri ve Rusiyeniñ ukrayin Qırımında tamır halqını yoq etmege tırışqanı aqqında "Sessiz sürgünlik" filminde aytıla. Ve bular Rusiye Qırımnı işğal etkeninden evel yaşağan ve ketmege mecbur olğan kerçek insanlardır", — dep ayta Elvina Seytbullayeva.
Filmde Rusiye akimiyetiniñ taqipleri sebebinden vatanını terk etmege mecbur olğan altı qırımtatarınıñ ikâyesi ve Qırımda qalmağa qarar bergen siyasiy mabüsniñ qadını aqqında ikâyesi tarif etile.
"Bu Mümine Saliyeva, uquq qoruyıcı, jurnalist. O pek cesür bir qadın. O, işğal etilgen Qırımda olıp keçkenler aqqında ayta, bu anda olıp keçken klassik siyasiy repressiyalar, dep ayta", — dep tarif etti jurnalist.
"Sessiz sürgünlik" müelliflerinen muzakereler festivalniñ Facebook saifesinde yayınlanacaq. Teşkilâtçılar, videoda körülecegimiz kibi, başqa tedbirlerniñ de irişilebilirligini temin etkenlerini aytalar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
