Aqyarlı yaldayıcı marafoncı, dissident Oleg Sofânik işğal etilgen Qırımdan ketip, esas Ukrainada buluna. Bu aqta Ukraina prezidentiniñ Qırım Muhtar Cumhuriyetindeki daimiy vekili Anton Korınevıç bildirdi.
Qırım.Aqiqat tafsilâtlı malümat almaq içün Sofâniknen bağlanmağa tırışa.
Oleg Sofânik aprelniñ 17-nde Qırımdan esas Ukrainağa ketmege tırışqan edi. Amma Rusiye FSBsiniñ sıñır idaresi buña izin bermedi.
Bundan soñ o, Rusiye vatandaşlığından çıquv arizasını berdi, dep bildirdi.
Aprel ayınıñ soñunda Sofânik kene Qırımdan ketmege tırıştı, amma Rusiye FSBsi yibermedi.
2019 senesi noyabrniñ 14-nde Rusiye quvetçileri Oleg Sofânikni Qırım ve Herson vilâyetiniñ memuriy sıñırında tuttı. Bundan evel o, Lukull limanından (Qırımnıñ ğarbinde) Aqyardaki Ömega körfezine yaldadı. 30 km mesafeni 10 saat içinde yaldadı – raatlanmayıp ve bir özü olıp. Bunı Sofânik qırımtatar sürgünliginiñ 75 yılına bağışladı.
Oleg Sofânik – meşur aqyarlı yaldayıcı marafoncı, Ukraina rekordları kitabınıñ rekordçısıdır. 2012 senesi mayıs ayına qadar Sofânik 50 marafonda yaldadı, eñ uzunı 350 km Cenübiy-Qıtay deñizinden edi. Sofânik Aq deñiz, Marmara deñizi, İstanbul boğazını, Çanaqqale boğazını yaldap keçti. Qırım yalısında 100 kilometrge qadar marafonlarda iştirak etti. Qışta suvuq suvda da yaldağanınen bellidir.
Aqyarlı dissident ola. Askerlikten ve Sovetler Birliginiñ vatandaşlığından vazgeçkeni içün onı psihiatrik tedaviylevge mecbur etken ediler.
