Ukraina Yuqarı Radasınıñ insan aqları vekâletlisi Lüdmila Denisova, halqara toplulıqnı Rusiye, işğal etilgen Qırım ve işğal etilgen Donbas topraqlarınıñ apishanelerinde tutulğan ukrainalı siyasiy mabüslerni azat ettirmek içün Rusiyege daa çoq basqı yapmasına çağıra.
«Rusiyede, vaqtınca işğal etilgen Qırımda, Lugansk ve Donetsk vilâyetleriniñ topraqlarında qanunsız tutulğan vatandaşlarımıznıñ ayatı er kün telükede. Olar destegimizge ve beraber yapacaq areketlerimizge muhtac», – dep yazdı Denisova Facebookta.
Ukraina ombudsmeni Rusiye Ukraina vatandaşlarını tutıp, büyük apis cezalarını bere, «azatlıqlarınıñ «fiyatını» mümkün olğanı qadar çoq yapmaq içün» zor şaraitlerde tuta, dep bildire.
Ukraina Tış işler naziri Dmıtro Kuleba emin ki, COVID-19 epidemiyasına baqmadan, tutulğan şahıslarnı deñişim ve qırımlılarnıñ Rusiye apishanelerinden azat etilüv meselesi aktual olıp qala.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısını aydınlatqan edi: 113-ten 115-ke qadar. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
