Link açıqlığı

Saatnıñ esas haberi

Deñişim çerçivesinde qırımlılarnı azat etüv meselesi koronavirus sebebinden «toqtatılmadı» – Kuleba


Dmıtro Kuleba
Dmıtro Kuleba

Ukraina Tış işler naziri Dmıtro Kuleba emin ki, COVID-19 epidemiyasına baqmadan, tutulğan şahıslarnı deñişim ve qırımlılarnıñ Rusiye apishanelerinden azat etilüv meselesi aktual olıp qala.

Bu aqta o, Azatlıq Radiosına ayttı.

«Bu mesele toqtatılmadı. Deñişim üzerinde çalışamız. Deñişim kerçekleştirilsin dep, Prezident ofisi ve Reintegratsiya nazirligi çalışalar. Şübhesiz, bunıñ içün qoşma epidemiologik, karantin tedbirleri alınmalı. Amma insanlarnıñ taqdiri, mabüslerimizniñ taqdiri prezident içün №1 prioritet olıp qala. Şunıñ içün iç bir koronavirus vatandaşlarımıznıñ esirlikten ve qanunsız apisten qaytması içün ğayretlerimizni solduramaz ya da toqtatamaz», – dedi nazir.

Minskteki Üç taraflı kontakt gruppasınıñ tarafları martnıñ 11-nde işğal etilgen Donetsk ve Lugansk vilâyetleriniñ rayonlarında tutulğan Ukraina vatandaşlarınıñ azat etilüvi aqqında añlaştı, dep bildirdi Prezident ofisiniñ reisi Andriy Yermak martnıñ 13-nde olğan brifingde.

Bundan evel Minskte Yermak, Rusiye prezidenti memuriyetiniñ reber muavini Dmitriy Kozaknen tutulğan şahıslarnı «er kesni er keske» formatında deñişimni muzakere etken edi.

Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısını aydınlatqan edi: 113-ten 115-ke qadar. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.

XS
SM
MD
LG