Ukraina Yuqarı Radasınıñ insan aqları vekâletlisi Lüdmila Denisova Rostov-na-Donudaki SİZO-da tutulğa Qırım sakini Timur Yalkabovnıñ sağlığı zayıflaşqanını bildire.
«Rusiye Federatsiyasınıñ işğalci akimiyet organları tarafından qanunsız tarzda «Hizb ut-Tahrir» teşkilâtında iştirak etmesinen qabaatlanğan ukrain siyasiy mabüsi Timur Yalkabovnıñ advokatından müşterisiniñ sağlığı bayağı zayıflaşqanını bildim. Timur Yalkabov 3-nci gruppa saqatı, bronhial astaması bar. Bedeniy yük sebebinden boğulğanından aytına, oña merdivenen çıqmaq bile qıyın. Bundan ğayrı Yalkabovnı büyrek ağrısı raatsızlay. Qırımtatarnıñ SİZO-ğa yerleştirilmesinden soñ allergiya da qoşuldı», – dep yazdı Denisova
Ombudsmannıñ sözlerine köre, tahqiqat tevqifhanesiniñ müdiriyeti Yalkabovğa tibbiy yardım iç köstermey ve kerekli ilâclarnen de temin etmey.
Rusiye zenaatdaşı Tatyana Moskalkovanı çareler körmege çağırdı.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
