Ukraina Yuqarı Radasınıñ insan aqları vekâletlisi Lüdmila Denisova sentâbrniñ 7-nde azat etilgen ukrainalı siyasiy mabüslerniñ ve Rusiyede ve işğal etilgen Qırımda apiste qalğanlarnıñ qorantalarınen körüşti.
«Azat etüv esnasınen bağlı bütün meselelerni laf ettik», – dep yazdı Denisova Facebookta.
Onıñ aytqanına köre, fizik ve maneviy sağlıq meselesi ve Rusiyede tutulğan ukrainalılarnıñ kerekli tibbiy yardımğa irişüvi müim olıp qala.
Denisova, Rusiye insan aqları vekâletlisi Tatyana Moskalkovağa tutulğan er bir kişinen bağlı «tekrar muracaat yapılacaq», dep işandırdı.
«Rusiyede ve işğal etilgen Qırımda alâ daa apiste qalğan Ukraina vatandaşlarınıñ azat etilmesi ve qaytması içün er kün iş yapıla. Qayd etem ki, Ukraina ve Rusiye arasında 2019 senesi iyülniñ 16-nda paylaşılğan cedvelde 113 Ukraina vatandaşından er birisi azat etilecek birinci kişi ola», – dedi Denisova. O, «113 ukrainalı eñ yaqın vaqıtta vatanğa qaytsın dep, er şey yapıla», dep qayd etti.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi.
Yuqarı Radanıñ insan aqları vekâletlisi Lüdmila Denisovanıñ malümatına köre, Rusiyede 113 Ukraina vatandaşı apiste tutula, 89 – qırımtatarıdır.
