Rusiyede daa 113 Ukraina vatandaşı tutula, olarnıñ çoqusı – qırımtatar halqınıñ vekilleri.
Bunı sentâbr 10-unda "1+1" televizion kanalınıñ efirinde Ukraina Yuqarı Radasınıñ insan aqları vekâletlisi Lüdmila Denisova ayttı.
"Rusiyede daa 113 Ukraina vatandaşı tutula, olarnıñ 89-ı - qırımtatarlar. Bu adamlarnı qaytarmaq içün şimdi Rusiyenen muzakereler etile. Amma ne vaqıt olacağını aytıp olamayım. Ümüt etem, yılnıñ soñunace olur", - dedi Denisova.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Ukraina prezidenti Volodımır Zelenskıy ukrainalılarnı ava limanında qarşıladı. O, Qırım.Aqiqatqa izaat berip, Rusiyede apiste tutulğan qırımtatar faalleriniñ azat etilüvi Ukraina-Rusiye almaşuvınıñ ekinci basamağı olacaq.
Qırımtatar Milliy Meclis reisi Refat Çubarov, Rusiye, "ukrain siyasiy mabüsleriniñ azat etilmesi aqqında muzakereler etilgende", ilhaq etilgen Qırım mavzusınen bağlı bütün laflarnı kestirmege tırışa, dep tüşüne.
