Ukraina Yuqarı Radasınıñ insan aqları vekâletlisi Lüdmila Denisova, Yalta "Hizb ut-Tahrir davası"nıñ iştirakçisi Arsen Cepparovğa tibbiy yardım istep, Rusiyede insan aqları boyunca vekâletli Tatyana Moskalkovağa muracaat etti.
"Arsen Cepparovnıñ aqlarını kütmek muracaatınen Rusiyede insan aqları boyunca vekâletli Tatyana Moskalkovağa hitap etem, hususan Cepparovnıñ temelli tibbiy baqıluvını yapmağa ve onıñ neticesinde kerekli tedbirlerni körmege rica etem", - yazdı o Facebookta.
Denisovanıñ malümatına köre, Cepparov daa evel muracaat etken sağlıq problemaları alâ daa çezilmedi. Hususan, onı pek başı ağıra, qan basqısı yüksek ve betindeki yaralar çıqtı.
Daa evel Yaltadaki «Hizb ut-Tahrir davasınıñ» advokatı Ayder Azamatovnıñ bildirgenine köre, al-azırda Rusiyeniñ Şahtı şeerindeki SİZOda tutulğan Arsen Cepparovnıñ sağlıq vaziyeti fenalaştı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
