Yaltadaki «Hizb ut-Tahrir davasınıñ» advokatı Ayder Azamatovnıñ bildirgenine köre, al-azırda Rusiyeniñ Şahtı şeerindeki SİZOda tutulğan Arsen Cepparovnıñ sağlıq vaziyeti fenalaştı.
«Arsenniñ qulaqları arqasında eki çeşit çiban çıqtı, pek ağıra. Bunıñnen beraber, Arsenniñ yüksek qan basımı, baş ağrısı ve betinde çıqqan yağ cismi problemleri bar edi», – dep yazdı advokat.
Advokatnıñ malümatına köre, SİZO memuriyeti mabüsniñ sağlığı fenalaşqanına qulaq asmay, tibbiy yardım kösterilmesine dair ağzaviy ve yazma arizalarına emiyet bermey.
«Hatırlatmaq isteyim ki, Ukraina Arbiy-deñiz quvetleriniñ eski cenk esiri Yuriy Budzılonıñ boynunda böyle çibanlar sıq-sıq çıqa edi, olarnı almağa mecbur ediler. Faqat Lefortovo SİZOsında Budhıloğa tibbiy yardım kösterilgen edi… Amma Arsen Cepparovğa ne içündir yardım kösterilmey ve SİZO insanğa qarşı, hususan Ukraina vatandaşına qarşı cinayet yapa», – dedi Azamatov.
Advokatnıñ qayd etkenine köre, Ukrainanıñ Rostov vilâyeti Baş konsulı Taras Malışevskiyge haber etildi ve o, yaqın vaqıtta Arsen Cepparovnı ziyaret etmeli.
Şahtı şeeri SİZO memuriyetiniñ hadimleri, Yaltadaki «Hizb ut-Tahrir davası» mabüsine tibbiy yardım kösterilmegenine dair malümatnı haber derc etilgen vaqıtta daa izaatlamadı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
