Ukraina Yuqarı Radasınıñ insan aqları vekâletlisi Lüdmila Denisova Rusiye ombudsmeni Tatyana Moskalkovağa, Qırım sakini İvan Yatskinniñ Lefortovo SİZO-sında aqlarınıñ bozulmasına cevap berme talabınen muracaat etti.
Bu aqta Lüdmila Denisova advokat Nikolay Polozov ile körüşken soñ Telegram kanalında yazdı.
“Rusiye insan aqları vekâletlisi Tatyana Moskalkovağa, İvan Yatskinniñ aqlarınıñ bozulması içün acele cevap tedbirleriniñ körülmesi ve tam şekilde tibbiy yardım kösterilmesi talabınen murcaat etem”, – dep yazdı o.
Bundan ğayrı Denisova Yatskinniñ fevralniñ 12-nde bir saat soqaqta qış urbasız ve ayaqqapsız tutulğanı aqqında BMT insan aqları yuqarı komissarı Mişel Baçelet, OSCE-niñ şimdiki reisi, İsveçiya TİN başı Ann Linde, BMT-niñ iskencelerge qarşı komitetiniñ reisi Yens Modvig, Avropa Şurasınıñ insan aqları komissarı Dunâ Miyatoviçni haberdar etecegini bildirdi.
Rusiyeniñ «Lefortovo» SİZOsında tutulğan qırımlı İvan Yatskin fevralniñ 12-nde bir saat soqaqta qış urbasız ve ayaqqapsız tutuldı, dep bildirgen edi advokatı Nikolay Polozov. Onıñ aytqanına köre, Yatskin qıçırsa da, 45 daqqa kimse yanına kelmegen.
Hatırlatamız, Moskva şeer mahkemesi qırımlı İvan Yatskinni daa eki ayğa – 2021 senesi aprelniñ 16-na qadar SİZOda qaldırdı.
Yanvarniñ 28-nde Qırımnıñ Curçı rayonındaki Toğaylı (Kormovoye) köyünde Yatskinniñ ömür arqadaşı Gülnara Kadırovanıñ evinde Rusiye quvetçileri tintüv keçirdi.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.
Polozov, Yatskin apiske alınğan soñ Qırımdan Moskvağa çıqarıldı, dep bildirgen edi. Onıñ aytqanına köre, Rusiye quvetçileri qırımlığa «büyük maneviy basqı» yaptı.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
