Link açıqlığı

Saatnıñ esas haberi

Rusiye SİZOsında qırımlı Yatskin bir saat suvuqta tışarıda tutuldı – advokat


Qırımlı İvan Yatskin
Qırımlı İvan Yatskin

Rusiyeniñ «Lefortovo» SİZOsında tutulğan qırımlı İvan Yatskin fevralniñ 12-nde bir saat soqaqta qış urbasız ve ayaqqapsız tutuldı, dep bildirdi advokatı Nikolay Polozov Facebookta.

«Lefortovo» SİZOsında kameralarnıñ ara-sıra sanitar işlevi yapıla. Bu kerekli tedbir, em de koronavirus pandemiyası vaqtında. Amma kamerası temizlengende İvan Yatskin başqa boş kamerağa alına edi, bu sefer ya boş kamera yoq edi, ya da başqa sebepler bar edi, amma SİZO hadimleri İvan Yatskinni kezdirmege qarar aldı. Ve kamerada olğan urbada yollağanlar: futbolka üstüne kofta, sport ştan ve yaz ayaqqabı. «Lefortovo» SİZOsınıñ hadimleri müvekkilimni -14 suvuqta kurtkasız qaldırıp, bir saat tutqanlar», – dep yazdı Polozov.

Onıñ aytqanına köre, Yatskin qıçırsa da, 45 daqqa kimse yanına kelmegen edi.

«Bugün İvan Yatskin ayaqlarını kösterdi, üç künden soñ bile parmaqları mos-mor, buzlağanını ifadeley. Bu tahqiqatçığa bildirildi, mor parmaqlar da kösterildi», – dep qoştı advokat.

Nikolay Polozov İvan Yatskinge ayaqlarını ekimler baqması içün ariza yazmasını tevsiye etti.

«Olğan hastalıqlarğa baqılsa, buzlamasınıñ ciddiy aqibetleri ola bile. «Lefortovo» SİZOsında kimler ve ne maqsadnen mabüslerge işkence dep sayıla bilgen böyle yanaşqanını bilecekmiz», – dep qayd etti advokat.

Hatırlatamız, Moskva şeer mahkemesi qırımlı İvan Yatskinni daa eki ayğa – 2021 senesi aprelniñ 16-na qadar SİZOda qaldırdı.

Yanvarniñ 28-nde Qırımnıñ Curçı rayonındaki Toğaylı (Kormovoye) köyünde Yatskinniñ ömür arqadaşı Gülnara Kadırovanıñ evinde Rusiye quvetçileri tintüv keçirdi.

Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.

Polozov, Yatskin apiske alınğan soñ Qırımdan Moskvağa çıqarıldı, dep bildirgen edi. Onıñ aytqanına köre, Rusiye quvetçileri qırımlığa «büyük maneviy basqı» yaptı.

Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.

2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.

Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.

Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.

Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.

XS
SM
MD
LG