Ukraina ombudsmeni Lüdmila Denisova Qırımda ibadethanelerge qarşı yapılğan vandallıqnı ve Qırım yarımadasınıñ tamır halqlarına qarşı duşmanlıq kösterüvini tenqit ete. Bunı Facebookta ombudsmenniñ Ofisi bildire.
"Aprelniñ soñunda işğal etilgen Qırımda qırımtatar halqına qarşı vandallıq areketi yapıldı, onıñ neticesinde Qarasuvbazar rayonınıñ Köpürliköyünde (Çeremisovka) cami zarar kördi. Vandallıqnıñ musulmanlar içün muqaddes Ramazan ayı başında yapılğanı hususan raatsızlay", - denile beyanatta.
Qayd etile ki, böyle areketler qırımtatar halqına qarşı nefret ve tecavuznıñ telükeli kösterüvidir ve olar yol berilmez dinler arası çatışmağa sebep ola bile.
"Ukraina ombudsmeni Lüdmila Denisova Qırımda ibadethanelerge qarşı yapılğan vandallıqnı ve Qırım yarımadasınıñ tamır halqlarına qarşı duşmanlıq kösterüvini tenqit ete.", - qayd ettiler ombudsmenniñ Ofisinde.
Tünevin Lüdmila Denisovanıñ bildirdi ki, Aqmescitteki «Hizb ut-Tahrir davası» mabüsleriniñ sağlıq vaziyeti fenalaşmağa devam ete.
Bundan evel o Rusiyede ve ilhaq etilgen Qırımda tevqif etilgen ve makemelengen adamlarnıñ anaları ve qadınlarınen onlayn körüşüvni keçirdi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlarnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
