Ukraina ombudsmeni Lüdmila Denisovanıñ bildirgenine köre, Aqmescitteki «Hizb ut-Tahrir davası» mabüsleriniñ sağlıq vaziyeti fenalaşmağa devam ete.
«Yürek ve içekler problemi olğan Şaban Umerovnıñ sağlıq vaziyeti fenalaştı. Rustem Seythalilov baş ağrıları ve siydik cınsiy sistemasınıñ problemleri bar, dep şikâyet ete. Bilâl Adilov ayaqları şişe ve eki aftadan berli keçmegen öksürik olğanını ayta. Boğucı küçlü öksürik Rustem Şeyhaliyev ve Enver Ametovnı da raatsızlay, ekincisiniñ aqciger veremi şübhesi bar. Cemil Gafarovnıñ hronik hastalıqları ağırlaştı, Alim Karimovnı küçlü mide astı ağrıları raatsızlay», – dep aytıla Denisovanıñ Facebook haberinde.
Denisovanıñ malümatına köre, Yaşar Muyedinov ve Raim Ayvazov mecburiy mahkeme-psihiatrik ekspertizasından keçkende psihiatrik hastahanesiniñ reberligi tarafından maneviy basqığa oğratıla.
Ukraina ombudsmeni Rusiye insan aqları vekâletlisi Tatyana Moskalkovanı qanunsız tutulğan Ukraina vatandaşlarına tibbiy yardım kösterilüvini ve uyğun tutuv şaraitleriniñ temin etilüvi içün acele tedbir almasına çağıra.
«Halqara toplulıqnı Rusiyeniñ halqara uquqnı ve alâ daa Kreml esirleri olğan Ukraina vatandaşlarınıñ aq ve serbestliklerini sistematik körmemezlikke urğanına cevap bermesine ve esirlerniñ Vatanğa qaytması içün basqı quvetleştirmesine çağıram», – dep yazdı Denisova.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlarnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
