Ukraina ombudsmeni Lüdmila Denisova, Qırımda tevqif etilgen faal Oleg prihodkoga ilâcı ve közlügini almağa yardım etmege Rusiye ombudsmeni Tatyana Moskalkovağa rica etti.
"Alınğan haberge köre, Oleg Prohodkonıñ aşqazan ve urologiya hastalıqları bar. Tuvğanları oña kerekli ilâclarnı ve közlükni yolladı. Amma SİZO hadimleri bu yollamanı oña bermey", - dep yazdı Denisova Facebookta.
O, "Ukraina vatandaşınıñ aqlarını kütmek içün, yani kerekli ilâc ve közlükni almaq içün, acele tedbirlerni körmege" talap ete.
Prihodkonıñ advokatı Nazim Şeihmambetov, tevqif etilgen faal Oleg Prihodkoğa, soyları Aqmescit SİZOsına yollağan ilâclarnı bermeyler, dep Qırım.Aqiqatqa haber etti.
Prihodkonıñ tutulğanını oktâbrniñ 10-nda saba kezlevli ukrain faali, yedinci çağırılış Ukraina halq deputatı Eduard Leonov haber etti. Faalniñ ömür arqadaşı Lübov Prihodko da tutulğan edi.
FSB hadimleri Rusiye Ceza kodeksiniñ 223.1 (patlayıcı maddelerni qanunsız azırlanması) ve 205 (terror ücümi) maddelerine istinaden qabaatlay.
2019 senesi fevralniñ 8-nde Qırımdaki FSB idaresiniñ hadimleri Saq rayonınıñ Orehovo köyünde Oleg Prihodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler. Rusiye quvetçileri Prihodkonıñ evinde keçirilgen tintüvni izaatlamadı. 2016 senesi iyün ayında Rusiye quvetçileri faalni maşinasındaki ukrain nomeraları içün tutqan edi.
