Ukraina ombudsmeni Lüdmila Denisova Ukraina prezidenti Volodımır Zelenskıynı Rusiyede ve işğali altındaki Qırımda tutulğan ukrainalılarnıñ qorantalarına kerekli içtimaiy imaye berip, olarnı temin etmek içün Nazirler şurasına belli vazifeler bermesine çağırdı. Bu aqta ombudsmenniñ içtimaiy ağlardaki haberinde aytıla.
«Ukrainanıñ birinci qadını Olena Zelenskayadan er bir qorantanı şahsiy kontrol altına almasını rica etem. Ukraina baş naziri Denıs Şmığal ve ükümetniñ er bir azasını bugün Ukraina kontrolindeki topraqlarda anasınen beraber yaşağan er bir balanı şahsiy vasiylik altına almalarına, Ukrainağa qarşı silâlı istilâ neticesinde qanunsız alda azatlıqtan marum etilgen şahıslarnı ve qorantalarını içtimaiy qoruv ve uquqiy status ile bağlı qanun leyhasını acele azırlap, Ukraina Yuqarı Radasınıñ baqmasına bermege ve belli devlet içtimaiy programmasını tasdıqlamasına çağıram», – dep aytıla Denisovanıñ haberinde.
Onıñ malümatına köre, 133 Ukraina vatandaşı, şu cümleden 97 qırımtatarı, Rusiye tarafından siyasiy sebeplerden taqip etile.
Ukraina prezidenti, ömür arqadaşı ve ükümet azaları Denisovanıñ bu muracaatına daa cevap bermediler.
O, halqara ükümet ve ükümetten tış teşkilâtlarnı, hususan Qızıl Haçnıñ Ukrainadaki Halqara komitetini Rusiye apsinde tutulğan qırımlılarnıñ balalarına gumanitar yardım da köstermelerine çağırdı. Denisova, babaları azat etilsin dep, halqara alandaki küreşni de quvetleştirmege rica ete.
Ukraina prezidenti Volodımır Zelenskıy Rusiye prezidenti Vladimir Putin ile kerçekleştirgen telefon subetinde Rusiye işğal etken Qırımda apiste tutulğan 22 qırımtatarınıñ azat etilüvini muzakere etti, dep bildirdi Ukraina prezidentiniñ ofis yolbaşçısı Andriy Yermak devlet yolbaşçısınıñ Donbas ziyareti vaqtında.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
