Ukraina Yuqarı Radasınıñ İnsan aqları vekâletlisi Lüdmila Denisova halqara ükümet ve ükümetten tış teşkilâtlarnı, hususan Qızıl Haçnıñ Ukrainadaki Halqara komitetini Rusiye apsinde tutulğan qırımlılarnıñ balalarına gumanitar yardım köstermelerine çağırdı. Denisova, babaları azat etilsin dep, halqara alandaki küreşni de quvetleştirmege rica ete.
«Vaqtınca işğal etilgen Qırımda bulunğan vatandaşlarımız, aq qorçalayıcılarımız, göñülli ve cemaat faallerimizden böyle qorantalarğa turmuşta, hususan balalarnıñ toplu yaşağan yerlerinde boş vaqıtlarda yapacaqlarını teşkil etüvde küçüni toplamalarını rica ettik. Ukrainalı siyasiy mabüs balalarınıñ lâyıq balalığı olmalı! Maqsadımız bir – babaları istilâcınıñ esirliginde qalğan vaqıtta olarnı diqqatsız qaldırmamaq», – dep aytıla Denisovanıñ Facebook haberinde.
Ukraina ombudsmeniniñ fikirince, 133 Ukraina vatandaşı, şu cümleden 97 qırımtatarı, Rusiye tarafından siyasiy sebeplerden taqip etile.
«112-si Rusiyede ve vaqtınca işğal etilgen Qırımda qanunsız tutula, qalğanlarınıñ areketleri sıñırlandı ve olar yaşağan yerlerinde buluna. 71-i 188 çağına yetmegen balanıñ babası ola», – dep qayd etti Denisova.
Onıñ bildirgenine köre, Rusiye apsinde bulunğan qırımlılarnıñ 10 ömür arqadaşı esas Ukrainanıñ farqlı regionlarında yaşağan 12 mektepten evel ve mektep yaşında balanı terbiye ete, 62 qadın balalarınen beraber Qırımda qaldı.
«Bu küzde işğal altındaki Qırımda siyasiy mabüslerniñ 17 balasından tek 14-ü birinci sınıfqa baracaq, Qırımnıñ tasil müessiseleriniñ «reberligi» üç balanıñ tasil aqqına körmemezlikke urdı», – dep bildire Denisova.
Bu malümatnı başqa bir menba tasdıqlamay, Qırımnıñ Rusiye akimiyeti bu malümatnı şimdilik izaatlamay.
Ukraina prezidenti Volodımır Zelenskıy Rusiye prezidenti Vladimir Putin ile kerçekleştirgen telefon subetinde Rusiye işğal etken Qırımda apiste tutulğan 22 qırımtatarınıñ azat etilüvini muzakere etti, dep bildirdi Ukraina prezidentiniñ ofis yolbaşçısı Andriy Yermak devlet yolbaşçısınıñ Donbas ziyareti vaqtında.
Onıñ hatırlatqanına köre, Volodımır Zelenskıy Qırım SİZOsında bulunğan qırımtatarı Ruslan Suleymanovnı azat etmege rica etti. İyülniñ soñunda üç yaşında oğlunıñ cesedi evleriniñ yanındaki çuqurda tapıldı.
Yermak, Üç taraflı bağ gruppasınıñ eñ yaqın toplaşuvlarında almaştırılacaq şahıslarnıñ cedvelleri tasdıqlanacaq, dep ümüt ete.
Kreml, Rusiye ve Ukraina prezidentleri arasında olğan bunıñ kibi laflar aqqında bildirmey.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
