Ukraina Yuqarı Radasınıñ insan aqları vekâletlisi Lüdmila Denisova Rusiye ombudsmeni Tatyana Moskalkovadan açlıq ilân etken ukrainalı faal Volodımır Baluhnıñ tutuluv şaraitlerini teşkerip, «onıñ Ukraina konsulı ile körüşüv aqlarını ğayrıdan tiklemek içün tedbir almasını» rica ete.
«Bu endi ekinci açlıq. Bıltır Volodımır 205 kün açlıq tuttı. Sağlığı büyük zarar kördi. Ekinci açlıq ayatı içün telükeli ola. Qorqunç tutuv şaraitleri, hususan eki ay devamında ceza izolâtorında qalması ve konsul ile körüşmege imkân berilmege onı kene radikal adım atmağa mecbur etti», – dep yazdı Denisova.
Onıñ bildirgenine köre, Ukrainanıñ Rusiye konsulı Baluh ile üç kere körüşmege tırıştı.
«Volodımır Ukraina vatandaşı olğanını ne qadar aytsa da, müessise memuriyeti Qırımda qayd olğanına esaslanıp, onıñ Rusiye vatandaşlığını qayd ete», – dep bildirdi Denisova.
Ukraina ombudsmeni Baluhnıñ açlıq ilân etecegine dair arizanı da derc etti.
Moskalkova Denisovanıñ muracaatı ile bağlı izaat daa bermedi.
İşğal etilgen Qırımda Rusiye mahkemesi tarafından mahküm etilgen ve Rusiyeniñ Tver vilâyetindeki koloniyada tutulğan Volodımır Baluh kene açlıq ilân etti. Bu aqta Rusiye Apostol pravoslav kilsesiniñ yepiskopı, Sankt-Peterburg Aq qorçalayıcı şurasınıñ azası Grigoriy Mihnov-Vaytenko iyünniñ 27-nde Qırım.Aqiqatqa bildirdi.
Bir qaç kün evelsi ukrainalı faal Volodımır Baluh Tver vilâyetiniñ koloniyasındaki ceza izolâtorına qapatıldı. Daa evel Baluhnı ceza izolâtorına avuştırğanda anda o, aman-aman eki ay bulundı. Soñra onı apishane hastahanesine avuştırğan ediler.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
